पणजी : सलामीस बढती मिळालेल्या संजुला नाईकचे नाबाद अर्धशतक, तसेच तिने तेजस्विनी दुर्गड व कर्णधार शिखा पांडे यांच्यासह केलेल्या महत्त्वपूर्ण भागीदारी या बळावर गोव्याने शुक्रवारी सीनियर महिला टी-20 क्रिकेट स्पर्धेत सलग चौथ्या विजयाची नोंद केली आणि एलिट ड गटात अव्वल स्थानही राखले. त्यांचा बाद फेरीतील प्रवेश जवळपास निश्चित मानला जातो.

मोहाली येथील महाराजा यदविंद्र सिंग क्रिकेट स्टेडियमवर झालेल्या लढतीत गोव्याने उत्तर प्रदेशला आठ विकेट्स आणि सहा चेंडू राखून सहजपणे हरविले. विजयासाठी 124 धावांचे आव्हान मिळाल्यानंतर गोव्याने 19 षटकांत फक्त दोन विकेट गमावून लक्ष्य गाठले. संजुलाने नाबाद 50 धावा केल्या. तिने 55 चेंडूंतील खेळीत चार चौकार मारले. संजुलाने तेजस्विनी (33) हिच्यासमवेत दुसऱ्या विकेटसाठी 70 धावांची भागीदारी करून संघाच्या विजयाचा पाया रचला. तेजस्विनीने 34 चेंडूंचा सामना करताना तीन चौकार व एक षटकार मारला. नंतर आक्रमक फलंदाजी केलेल्या शिखाच्या साथीत संजुलाने तिसऱ्या विकेटसाठी 46 धावांची अभेद्य भागीदारी केली. शिखाने पाच चौकारांच्या मदतीने 19 चेंडूंत 29 धावांची खेळी केली.

त्यापूर्वी उत्तर प्रदेशने नाणेफेक जिंकून प्रथम फलंदाजी स्वीकारली, पण गोव्याच्या नियंत्रित गोलंदाजीसमोर त्यांना मोठी धावसंख्या उभारता आली नाही. 6 बाद 123 धावांचीच त्यांना मजल मारता आली. चौथ्या विकेटसाठी अंजली सिंग व मुस्कान मलिक यांनी केलेल्या 43 धावांच्या भागीदारीमुळे उत्तर प्रदेशला थोडेफार सावरता आले. डावाच्या अखेरीस निशू चौधरी हिने फटकेबाजी केल्यामुळे उत्तर प्रदेशला सव्वाशेच्या जवळपास धावा केल्याचे समाधान लाभले.

शेवटची लढत बडोद्याशी

एलिट ड गटात 16 गुणांसह गोव्याचा संघ प्रथम आहे. त्यांचा शेवटचा सामना रविवारी (ता. 24) बडोद्याविरुद्ध होईल. शुक्रवारी बडोद्याने गुजरातला 20 धावांनी हरवून तिसरा विजय नोंदविला. त्यांचे 12 गुण झाले असून दुसरा क्रमांक आहे. गोव्याने बडोद्यालाही हरविल्यास शिखा पांडेच्या नेतृत्वाखालील संघ गटसाखळीत अव्वल राहत थेट उपांत्यपूर्व फेरीत दाखल होईल. गटातील अन्य संघांत उत्तर प्रदेशचे आठ, तर गुजरात, विदर्भ व उत्तराखंडचे प्रत्येकी चार गुण आहे. अखेरच्या तिन्ही संघांचे आव्हान संपुष्टात आले आहे.