Goa Crime: गोव्यात गुन्हेगारीच्या घटनांमध्ये दिवसेंदिवस वाढ होत असून नुकतीच एका महिलेचा पाठलाग करून तिला त्रास देण्याच्या गुन्ह्याखाली पोलिसांनी एका तरुणाला अटक केल्याची माहिती हाती येतेय.

या घटनेसंबंधी पर्वरी पीआय राहुल परब यांनी दिलेल्या माहितीनुसार, एका महिलेने तिचा मित्र ऍशले मॅन्युएल फर्नांडिस, वय-27 वर्षे हा तिचा पाठलाग करत असल्याची तक्रार दाखल केली होती.

या प्रकरणी पोलिसांनी कलम 354, 509, 506(ii) अंतर्गत एफआयआर नोंदवून आरोपीला समन्स देखील बजावले होते.

मात्र असे होऊन देखील त्याने आपले कृत्य सुरूच ठेवले होते. उलट ऍशले याने तिला गंभीर परिणाम भोगायला तयार राहा अशी धमकी देखील दिली होती. तसेच तो तिच्या इन्स्टाग्राम सारख्या सोशल नेटवर्किंग साइटवर लक्ष ठेवत असून तिला अश्लील मेसेज पाठवायचा.

त्यामुळे शेवटी पर्वरी पोलिस ठाण्याच्या पथकाने वास्को येथे सापळा रचत आरोपीला पकडले. या प्रकरणाचा पुढील तपास पीएसआय सर्वेश भंडारी यांच्या देखरेखीखाली एसडीपीओ पर्वरी विश्वेश कर्पे आणि एसपी नॉर्थ निधिन वलसन यांच्या देखरेखीखाली सुरू आहे.