वाळपई : आपल्याला बालपणापासून गेमिंगची खूपच आवड असून त्यासाठी घरच्यांचे सहकार्य हवे तसे मिळत नाही. त्यासाठी जीवनात यश कसे साध्य करू, असा सवाल करत वाळपईच्या डॉ. के.ब. हेडगेवार शाळेतील नववीतील विद्यार्थी श्रीजीत वैभव गाडगीळ याने थेट प्रत्यक्षात भेट घेऊन पंतप्रधान नरेंद्र मोदींशी संवाद साधला व मोदींकडून जीवनातील यशाचा मार्ग जाणून घेतला.

‘परीक्षा पे चर्चा’ या परस्पर संवादी उपक्रमांतर्गत गोव्यातून इयत्ता नववीत शिकणाऱ्या कु. श्रीजीत वैभव गाडगीळ याची निवड झाली होती. पंतप्रधान मोदींनी श्रीजीतशी संवाद केला. ते म्हणाले तुला जर घरातून, गावातून तुझ्या कलेला प्रतिसाद हवा असेल तर तुझे स्वत:चे व्हिडीओ चॅनेल सुरू कर. एखादी गेम त्या माध्यमातून तयार करून अपलोड कर.

त्यातून तुझ्या कलेला दाद लोकांकडून नक्कीच मिळेल, आई वडील तुझ्या कामाविषयी निश्चित खात्री बाळगतील. आजच्या काळात गेमिंग हे केवळ मनोरंजन नाही. तर त्यातून आत्मनिर्भर बनण्याचा मार्ग होऊ शकतो. ते कौशल्य आत्मसात कर. त्यातून तुझे चांगले उज्ज्वल भविष्य घडणार आहे, असा सल्लाही मोदींनी व्यक्त केला.

संपूर्ण गोव्यातून प्रत्येक शाळेतील दोन विद्यार्थ्यांना आपल्या प्रश्नांवर छोटे व्हिडिओ करून एससीईआरटी संस्थेला पाठवायचे होते. त्या सर्वांमधून श्रीजीत गाडगीळची निवड झाली. कु.श्रीजीत गाडगीळ यांचे डाॅ.के.ब.हेडगेवार शिक्षण प्रसारक मंडळ, स्थानिक व्यवस्थापन मंडळ व पालक शिक्षक संघ आणि सर्व शिक्षक व विद्यार्थ्यांकडून अभिनंदन करण्यात येत आहे.

जुगारासारख्या गोष्टी नकोत!

गेमिंगव्दारे तुझी निर्णय घेण्याची गती वाढेल. त्यातून विचार प्रगल्भ बनून तुझे करियर घडणार आहे. केवळ टाईम पास करण्यापेक्षा गेमिंगला तुझे करियर बनवावे. भारतीय संस्क्ुती महान असून पौराणिक, आध्यात्मिक कथेवर स्वत:चे खेळ तयार कर. जुगारासारख्या गोष्टी गेममधून होऊ नयेत, असा मोदींनी श्रीजीत गाडगीळला सल्ला दिला.