पणजी: गोव्यात कोविड-19 च्या वाढत्या प्रादुर्भावामुळे ऑफलाइन परीक्षा तीन आठवड्यांनी पुढे ढकलल्यानंतर गोवा विद्यापीठाने (GU) टर्म ब्रेकच्या तारखांमध्ये बदल केला आहे. आता 7 फेब्रुवारीपासून ऑफलाइन परीक्षा सुरू होणार असल्याने 24 ते 29 जानेवारी या कालावधीत विद्यार्थ्यांना (Students) टर्म ब्रेक दिला जाईल. (Latest Goa University News Updates)

गोवा विद्यापीठाच्या परिपत्रकानुसार, टर्म ब्रेक 9 फेब्रुवारी ते 13 फेब्रुवारी ऐवजी 24 जानेवारी ते 29 जानेवारी पर्यंत असेल. केवळ अंतिम वर्षाच्या विद्यार्थ्यांच्या परीक्षा ऑफलाइन घेतल्या जाणार आहेत. कोविड-19 (COVID-19) मुळे या परीक्षा 7 फेब्रुवारीपर्यंत पुढे ढकलण्यात आल्या आहेत. उर्वरीत सर्व विद्यार्थ्यांच्या परीक्षा ठरलेल्या वेळापत्रकानुसार ऑनलाइन पद्धतीने घेतल्या आहेत.

गोवा विद्यापीठ (Goa University) आणि उर्वरीत महाविद्यालयांमध्ये शिकत असलेल्या पदव्युत्तर विद्यार्थ्यांची परीक्षा देखील ऑफलाइन घेतली जाणार आहे. दरम्यान, गोवा विद्यापीठने आणखी एका परिपत्रकात म्हटले आहे की, जे विद्यार्थी या परीक्षेच्या एक किंवा अधिक पेपरला बसू शकत नाहीत त्यांच्यासाठी विशेष परीक्षा घेण्यात येतील. सार्वजनिक वाहतूक नसणे, कुटुंबातील सदस्य कोविड पॉझिटिव्ह असणे किंवा आजारी विद्यार्थी विशेष परीक्षेला बसण्यास पात्र असतील.