डिचोली: औषधी गुणधर्म असलेली विविध कंदमुळे बाजारात विक्रीस दाखल झाली असली, तरी यंदा त्यांची आवक कमी आहे. पिकाच्या ऐन हंगामात पावसाने दडी मारल्याने उत्पादनावर परिणाम झाला आहे. शिवाय हत्तींसह रानटी जनावरांकडून झालेल्या नासधुशीचाही मोठा फटका बसला आहे. त्यामुळे आगामी काळात कंदमुळांना चांगला भाव मिळण्याची शक्यता आहे.

सध्या डिचोली बाजारात अळूची माडी, काटेकणगी, सुरण आणि कारांदे विक्रीस उपलब्ध आहेत. मात्र गेल्या काही वर्षांच्या तुलनेत त्यांचे प्रमाण कमी आहे. दरवर्षी या काळात कंदमुळांनी बाजारपेठ गजबजून जाते; यंदा मात्र अद्याप अपेक्षित आवक झालेली नाही.

आवक कमी असली तरी सध्या कंदमुळांचे दर स्थिर आहेत. आकारानुसार अळूची माडी १०० ते २०० रुपये नग, तर काटेकणगी १०० ते २०० रुपये वाटा दराने विकला जात आहे. काही विक्रेते अळूची माडी तसेच अन्य कंदमुळे सुमारे ६० रुपये किलो दरानेही विकत आहेत.

ऐन पिकाच्या काळात पाऊस कमी झाल्याने यंदा कंदमुळांचे उत्पादन घटले आहे. त्यामुळे गेल्या काही वर्षांच्या तुलनेत यंदा बाजारातील आवक कमी असल्याची माहिती विक्रेत्यांनी दिली.

रानटी जनावरांकडून नासधूस

गेल्या काही वर्षांपासून कर्नाटकातील जांबोटी, कणकुंबी आदी भागातील कंदमुळांनीही डिचोली बाजारपेठेत स्थान मिळविले आहे.

आठवडी बाजाराच्या दिवशी कर्नाटकातील कंदमुळांचा स्वतंत्र बाजार भरतो. स्थानिक विक्रेतेही ते घाऊक दराने खरेदी करून विक्री करतात.

यंदा कर्नाटकातूनही अपेक्षित प्रमाणात आवक झालेली नाही. एका बाजूला कमी पाऊस तर दुसऱ्या बाजूला रानटी जनावरांचा उपद्रव.

सध्याचे दर

अळूची माडी : १०० ते २०० रुपये नग (आकारानुसार)

काटेकणगी : १०० ते २०० रुपये वाटा

कारांदे : ८० ते १०० रु. किलो