पणजी: गोवा सरकारनं राज्यातील पोलिस यंत्रणेबाबत एक महत्त्वाचा निर्णय घेतला आहे. वाहतूक नियम उल्लंघन प्रकरणी वाहतूक पोलिसांना चलन (Traffic Challan) देण्याच्या अधिकारात मोठा बदल करण्यात आला आहे. मुख्यमंत्री डॉ. प्रमोद सावंत यांनी आज (४ एप्रिल) पार पडलेल्या मंत्रिमंडळ बैठकीत नव्या नियमाबाबत माहिती दिली.

नव्या नियमानुसार, दिवसाच्या वेळेत (सकाळपासून सायंकाळपर्यंत) केवळ बॉडी कॅमेरा असलेल्या पोलीस निरीक्षकांनाच चलन देण्याचा अधिकार असेल, तर रात्रीच्या वेळी देखील बॉडी कॅमेरा असलेल्या पोलीस निरीक्षक आणि उपनिरीक्षक यांनाच हा अधिकार असेल. अन्य कोणत्याही पदावरील पोलिस अधिकाऱ्याला चलन देण्याचा अधिकार राहणार नाही, असं मुख्यमंत्र्यांनी स्पष्ट केलं.

...तर निलंबनाची कारवाई होणार

जर इतर पोलिस अधिकारी नियमांचे उल्लंघन करून चलन देण्याचा प्रयत्न करत असतील, तर संबंधित नागरिकांनी त्याचा फोटो घेऊन संबंधित पोलीस स्थानकाला पाठवावा. असे करणाऱ्या अधिकाऱ्यावर तातडीने कारवाई केली जाईल आणि त्याला निलंबित करण्यात येईल, असं देखील मुख्यमंत्र्यांनी बैठकीत स्पष्ट केलं.

बैठकीत अनेक मुद्द्यांवर चर्चा

हा निर्णय आजपासून (४ एप्रिल २०२५) अमलात आणला जात असून, राज्यभरातील पोलिसांनी नव्या नियमांचे काटेकोर पालन करावे, असे आदेश बैठकीत देण्यात आले आहेत.

बैठकीत नवीन कायद्यांची अंमलबजावणी, फॉरेन्सिक व्हॅन अधिक सक्षम करणे, पोलिसांसाठी व्हिडिओ कॉन्फरन्सिंग सुविधा वाढवणे, फॉरेन्सिक तपास विभागात भरती, ई-एफआयआर, पोलिस प्रशिक्षणावर भर यासारख्या अनेक मुद्द्यांवर चर्चा करण्यात आली.