गोवा: पर्यटकांच्या गैरवर्तनाचा वाढता प्रकार अधोरेखित करणारी एक धक्कादायक घटना गोव्यात समोर आली आहे. २९ मेच्या दिवशी दोन दारुड्या अल्पवयीन पर्यटकांनी एका स्थानिक रहिवाशाच्या पाळीव श्वानाला ओढत नेऊन गंमत म्हणून स्विमिंग पूलमध्ये फेकल्याचा आरोप आहे. या श्वानाला त्वचेची गंभीर ॲलर्जी होती, त्याला पूलमध्ये सोडल्यानंतर भरपूर त्रास झाला तर पर्यटक मात्र हसत-खेळत याचा व्हिडिओ काढत होते.

श्वानाला शारीरिक आणि भावनिक धक्का

या धक्कादायक घटनेची माहिती श्वानाच्या मालकाने दिली. त्यांच्या मते, या कृत्याने केवळ श्वानाला शारीरिक इजा झाली नाही, तर तो भावनिकदृष्ट्याही खूप घाबरला आहे. या घटनेमुळे स्थानिकांमध्ये तीव्र संताप व्यक्त होत आहे.

काही पर्यटकांकडून दाखवला जाणारा अनादर आणि त्यांना मिळालेले फाजील स्वातंत्र्य यामुळे अशा घटना घडत असल्याचे स्थानिकांचे म्हणणे आहे.

'अतिथी देवो भव'चा अपमान!

स्थानिक नागरिक यापुढे अशा घटनांवर कठोर कारवाई करणे आणि सामाजिक जीवन व प्राणी कल्याणाबद्दल आदर राखण्याची मागणी करत आहेत. गोव्याची 'अतिथी देवो भव' या भावनेचा गैरवापर किंवा गैरवर्तन केल्यानंतर गोमंतकीय सहनशीलता दाखवतील असा गैरसमज करून घेऊ नये असेही ते ठामपणे सांगत आहेत. अशा घटनांमुळे गोव्याच्या पर्यटन प्रतिमेला धक्का लागत असून, पर्यटकांनी जबाबदारीने वागावे, असे आवाहन केले जात आहे.