पणजी: ‘गोवा पर्यटक व्‍यापार नोंदणी कायद्या’चे उल्लंघन करणाऱ्यांवर कारवाईचे अधिकार पर्यटन खात्‍याने उत्तर आणि दक्षिण गोव्‍याच्‍या उपसंचालकांना दिलेले आहेत. त्‍यामुळे दोन्‍ही उपसंचालक कायद्याचे उल्लंघन करून पर्यटन व्‍यवसाय थाटणाऱ्यांवर कारवाई करू शकतात. संचालक केदार नाईक यांनी याबाबतचा आदेश जारी केला आहे.

पर्यटन क्षेत्रातील नियम अधिक कडक करण्याच्या उद्देशाने केलेल्या प्रशासकीय बदलाअंतर्गत पर्यटन विभागाने उत्तर आणि दक्षिण गोव्‍याच्‍या पर्यटन उपसंचालकांना ‘पर्यटक व्यापार नोंदणी कायद्या’अंतर्गत निर्णय घेण्याचे अधिकार दिले आहेत. ते त्‍यामुळे कायद्याचे उल्लंघन करून व्‍यवसाय थाटणाऱ्यांना ‘कारणे दाखवा’ नोटिसा बजावू शकतात, अशा प्रकरणांत सुनावणी घेऊ शकतात, संबंधितांवर दंडात्‍मक कारवाई करू शकतात. तसेच कायद्याचे उल्लंघन झाल्‍याचे सिद्ध झाल्‍यास संबंधित आस्‍थापनांची नोंदणी रद्द करण्याचाही निर्णय घेऊ शकतात, असे आदेशात म्‍हटले आहे.

पथकांवरही ठेवणार देखरेख

संबंधित उपसंचालक आपापल्या कार्यक्षेत्रात संपूर्ण प्रभारी असतील. ट्रॅव्हल एजन्सी, शॅक्स आणि जलक्रीडा यांसारख्या पर्यटन उपक्रमांच्या अर्जांची छाननी, कागदपत्रांची पडताळणी आणि तपासणीचे पर्यवेक्षण करण्‍याचा अधिकार त्‍यांना असेल. तसेच नियमांचे पालन करण्यासाठी आणि पर्यटनस्थळांवर सुव्यवस्था राखण्यासाठी नेमण्‍यात येणाऱ्या पथकांवर देखरेख ठेवण्‍याचा अधिकारही त्‍यांना असेल, असेही आदेशात नमूद करण्‍यात आले आहे.