Goa Tourism 2023: राज्यात येणाऱ्या देशी-विदेशी पर्यटकांना आता गोव्याला भेट देण्याचा हेतू सांगण्याची सक्ती गोवा सरकारने केली आहे.

पर्यटकांनी हॉटेलमालकांना ही माहिती विहीत नमुन्यात भरून सादर करणे सक्तीचे केले आहे. यापूर्वी केवळ विदेशी पर्यटकांची माहिती देणे हॉटेल व गेस्ट हाऊस चालकांसाठी सक्तीचे होते.

मोपा येथे मनोहर आंतरराष्ट्रीय विमानतळाचे उद्‍घाटन मार्चमध्ये झाल्यानंतर देशातील छोटी-मोठी शहरे हवाई मार्गाने गोव्याला जोडली गेली आहेत. गोव्यातून देशात किमान ७० ठिकाणी थेट विमानसेवा सुरू करण्यात आली आहे.

त्यामुळे पर्यटकांची संख्या सध्या वाढली आहे. यामुळे गोव्यात पर्यटक का येतात, याची माहिती संकलीत करणे पर्यटन खात्याने सुरू केले आहे. हॉटेल व गेस्ट हाऊस चालकांनी पर्यटकांची माहिती खात्याला पुरवण्याची सक्ती करणारा आदेश पर्यटन संचालक सुनील अंचीपखा यांनी जारी केला आहे.

...ही माहिती आवश्‍यक

या आदेशानुसार पर्यटकाचे पूर्ण नाव, लिंग, वय, पूर्ण पत्ता, किती पर्यटक आले, किती खोल्या घेतल्या, त्यासाठी किती दर आकारण्यात आला, किती तारखेला आले आणि किती तारखेला निघाले, त्यांना गोवा भेटीची प्रेरणा कुठून मिळाली, याची माहिती देणे आता बंधनकारक केले आहे.