पणजी : गोव्यातील पर्यटन हंगाम हळूहळू संपण्याच्या टप्प्यावर असतानाही सुमारे ६० टक्के शॅक अजूनही पर्यटकांसाठी सुरू आहेत, तर उर्वरित ४० टक्के शॅक बंद करण्यात आले असल्याची माहिती अखिल गोवा शॅकमालक संघटनेचे अध्यक्ष क्रुझ कार्दोझ यांनी दिली.

हवामान बदल आणि पर्यटकांची घटती संख्या लक्षात घेता काही शॅक मालकांनी आधीच आपले शॅक बंद करण्याचा निर्णय घेतला आहे. गोवा पर्यटन विभागाने यंदा हंगामासाठी एकूण ३४० शॅकना परवानगी दिली होती. उत्तर आणि दक्षिण गोव्यातील कळंगूट, बागा, अंजुना, पाळोळे, मिरामार, कोलवा यांसारख्या प्रमुख समुद्रकिनाऱ्यांवरील शॅक यामध्ये समाविष्ट होते. नोव्हेंबर महिन्यापासून पर्यटकांची संख्या वाढली होती, ज्यामुळे या शॅक व्यवसायाला चालना मिळाली.

सध्या मात्र मॉन्सूनपूर्व वातावरणामुळे समुद्रकिनारी हवामान बदलत आहे. परिणामी काही शॅकमालकांनी सुरक्षेच्या दृष्टिकोनातून व आर्थिक व्यवहार्यतेच्या दृष्टीने शॅक बंद केले आहेत. मात्र अजूनही ६०% शॅक सुरू असून काही विदेशी पर्यटक व स्थानिक पर्यटक यांचा वावर या शॅकमध्ये दिसत आहे.

दरवर्षीप्रमाणेच जून महिन्याच्या पहिल्या आठवड्यात बहुतांश शॅक बंद होतील, अशी शक्यता असून, पर्यटन विभागाकडूनही शॅक बंद करण्याबाबत सूचना लवकरच जाहीर होण्याची अपेक्षा आहे.