पणजी: एका ठिकाणची टॅक्सी दुसरीकडे पर्यटकांना घ्यायला गेल्यावर होणारे वाद शमण्याच्या मार्गावर असतानाच आता टॅक्सी व्यावसायिकांपुढे केरळ सरकार आव्हान उभे करणार आहे. केरळच्या राज्य परिवहन महामंडळाने गोव्यात पर्यटक आणण्याची सेवा सुरू करण्याचे ठरविले आहे.

या महामंडळात पर्यटन सेवा विभाग आहे. त्या विभागातून केरळ परिवहन महामंडळाच्या बसमधून कासारगोडपर्यंत पर्यटक आणण्यात येणार आहेत. तेथून खासगी बसने त्यांना गोव्यात फिरविले जाणार आहेत. या पर्यटकांसाठी हॉटेल्सचे आरक्षण केरळ पर्यटन विकास महामंडळ करणार आहे.

केरळ राज्य मार्ग परिवहन महामंडळाच्या बजेट पर्यटन उपक्रमाला प्रारंभी मिळालेल्या यशानंतर आता या उपक्रमाचा विस्तार करण्यात येत असून गोव्यासाठी एक आकर्षक फ्लॅगशीप पॅकेज सादर करण्यात येत आहे. तीन रात्री आणि दोन दिवसांचा हा प्रवास राज्य परिवहनासाठी एक महत्त्वाचा टप्पा ठरत असून पारंपरिक मंदिर पर्यटनाच्या पलीकडे जाऊन उच्च मागणी असलेल्या विश्रांती (लेझर) पर्यटनाकडे टाकलेले पाऊल मानले जात आहे.

परवडणारी किंमत आणि आराम यांचा समतोल राखण्यासाठी प्रवास दोन टप्प्यांत विभागला आहे. प्रवासी प्रथम केरळ राज्य परिवहन महामंडळाच्या बसने कासारगोडपर्यंत प्रवास करतील. त्यानंतर तेथून पुढील सीमापार प्रवासासाठी खासगी लक्झरी एसी बसची व्यवस्था करण्यात येणार आहे.

बजेट पर्यटनाचा दर्जा उंचावण्यासाठी महामंडळाने केरळ टुरिझम डेव्हलपमेंट को-ऑपरेटिव्ह सोसायटीसोबत भागीदारी केली असून या माध्यमातून दर्जेदार हॉटेल निवासाची सुविधा देण्यात येणार आहे. दरम्यान, गोवा पर्यटन पॅकेजच्या तिकिटांच्या किमती निश्चित करण्याचे काम अंतिम टप्प्यात आहे.

कशी आहे पॅकेजची रचना?

या पॅकेजची रचना सर्वसमावेशक अनुभव देण्यासाठी केली आहे. यामध्ये गोव्यात सूर्यकिरणांनी न्हालेल्या समुद्रकिनाऱ्यांचा आनंद, युनेस्कोच्या यादीतील ऐतिहासिक वारसा स्थळांची भेट, तसेच जगप्रसिद्ध नाईटलाईफ आणि गोवन खाद्यसंस्कृतीचा अनुभव यांचा समावेश आहे.