Old Dona Paula Jetty: गोव्याची राजधानी पणजीतील एक सुप्रसिद्ध पर्यटन केंद्र असलेल्या दोना पावला येथील जुन्या जेट्टीचा सुमारे 49 मीटरचा भाग जीर्ण झाला आहे.

त्यामुळेच तो पर्यटकांसाठी बंद करण्यात आला आहे. तर नूतनीकरण केलेल्या जेटीचा मोठा भाग पर्यटक आणि स्थानिकांसाठी सध्या खुला आहे.

दोना पावला जेटीच्या नुतणीकरणाचा पहिला टप्पा सुरू झाल्यानंतर गोवा पर्यटन विकास महामंडळाने (GTDC) जुन्या जेटीची संरचनात्मक दुरुस्ती आणि पुनर्बांधणी करण्याचा निर्णय घेतला आहे.

यासाठी अंदाजे 7.5 कोटी रुपये खर्च येणार आहे. तसेच एक वर्षात हे काम पूर्ण करण्याची योजना आहे.

या कामासाठी कंत्राटदार निवडण्यासाठी GTDC ने निविदा काढली आहे आणि 14 डिसेंबर रोजी निविदा उघडण्यात येणार आहे.

सार्वजनिक बांधकाम विभागाने (पीडब्ल्यूडी) जुन्या जेट्टीचा भाग धोकादायक असल्याचा इशारा दिल्यानंतर या ओल्ड जेट्टीचा सुमारे 49 मीटरचा भाग पर्यटकांसाठी बंद करण्यात आला होता. PWD ने अहवालात ओल्ड जेटीची पुनर्बांधणी करावी, असे सुचवले होते.

GTDC ने वास्तुविशारद आणि प्रकल्प व्यवस्थापन सल्लागार म्हणून Darashaw & Co ची नियुक्ती केली आहे. फर्म रेखाचित्रांचा पुरवठा करेल आणि प्रकल्पाच्या अभियांत्रिकी आणि अंमलबजावणीवर देखरेख करेल.

जेट्टीचे रेलिंग अनेक ठिकाणी तुटलेले किंवा गायब असून ते गंजले असल्याचे महामंडळाच्या अधिकाऱ्यांनी सांगितले. इलेक्ट्रिकल फिक्स्चरची दुरवस्था झाली आहे आणि यातील सळ्या उघड्या पडल्या असून गंजलेल्या आहेत.

या सर्वांमुळे जेट्टी स्थानिकांसह पर्यटकांसाठी धोकादायक बनली आहे.