पणजी: देशभरातील विद्यार्थ्यांसाठी नव्याने ‘अपार आयडी’ क्रमांक नोंद करण्यास सुरुवात झाली असून गोवा या नोंदणीत अघाडीवर असल्याचे शिक्षण संचालनालयाने म्हटले आहे. राज्यात ‘अपार आयडी’ नोंदणी सुरळीतपणे सुरू आहे. गोवा सरकारकडून राज्यातील सर्व शालेय प्रवेशित विद्यार्थ्यांसाठी ऑटोमेटेड परमनंट ॲकॅडमिक अकाउंट रजिस्ट्री हा १२ अंकी ओळख क्रमांक तयार केला जातोय. न्यू एज्युकेशन पॉलिसीच्या अंतर्गत 'वन नेशन, वन स्टुडंट आयडी' या उपक्रमाचा भाग म्हणून सरकारकडून ही मोहीम चालवली जात आहे.

राज्यातील सर्व शाळांमध्ये नोंदणी प्रक्रिया सुरू झाली आहे. मोठ्या प्रमाणात नोंदणी देखील करण्यात येत आहे. राज्यातील ५१ हजारांहून अधिक विद्यार्थ्यांनी ‘अपार’ची नोंदणी केली आहे. त्यासोबतच राज्याला १०० टक्के साक्षर राज्य घोषित करण्यासाठी सरकार प्रयत्नरत आहे. त्यासाठी सरकार ३५ वर्षांवरील सर्व प्रौढांना अक्षरओळख करून देत आहे. राज्यातील सुमारे ३ हजार अक्षरओळख नसलेल्या नागरिकांना प्रशिक्षण देण्यात येत आहे. प्रौढांना शिकविणाऱ्या शिक्षक तसेच काही प्रौढ नागरिकांच्या ‘उल्हास मेळावा’चे २६ जानेवारी रोजी आयोजन करण्यात आले आहे.

देशातील सर्व शालेय विद्यार्थ्यांना युनिक आयडी क्रमांक देण्यासाठी राष्ट्रीय शैक्षणिक धोरण २०२० च्या अंतर्गत अपार ओळखपत्र तयार करण्याच्या प्रक्रियेला ऑक्टोबर महिन्यात सुरूवात करण्यात आली होती आणि १३ डिसेंबरपर्यंत राज्यातील सर्व विद्यार्थ्यांचे अपार ओळखपत्राचे काम पूर्ण करण्याचे उद्दिष्ट शिक्षण संचालनालयाने ठेवले होते.

या कार्डमध्ये विद्यार्थ्यांचा शैक्षणिक डेटा, कामगिरी, रिपोर्टकार्ड डिजिटल स्वरूपात मिळेल. त्यासोबत एका शाळेतून दुसऱ्या शाळेत प्रवेश मिळविण्यासाठी देखील हे महत्त्वाचे ठरणार आहे. याशिवाय हे कार्ड विद्यार्थ्यांची शैक्षणिक प्रगती आणि उपलब्धी सहजतेने ट्रॅक करेल.