चोर्ला घाटातील मुख्य रस्त्यावर झाड आणि दरड कोसळल्यामुळे वाहतूक ठप्प झाली होती. मात्र, डिचोली वाहतूक पोलिस इन्चार्ज किशोर आमोणकर यांच्या मार्गदर्शनाखाली जेसीबीच्या सहाय्याने रस्त्यावर पडलेले झाड आणि माती हटवण्यात आली. वाहतूक पुन्हा सुरळीत.

तुये औद्योगिक वसाहतीतील आईस क्यूब फॅक्टरीमध्ये अमोनिया गॅसची गळती झाली. सुदैवाने कोणत्याही प्रकारची जीवीतहानी झाली नाही.

तिस्क-उसगाव येथे टेम्पोची स्कूटरला धडक. स्कूटर वरील दोघेजण जखमी. जखमीवर उपजिल्हा रुग्णालयात उपचार सुरु आहेत.

वीज मंत्री सुदिन ढवळीकर यांनी बारा ज्योतिर्लिंगांपैकी एक असलेल्या देव घृष्णेश्वराचं दर्शन घेतले. या वेळी त्यांनी विधिपूर्वक अभिषेक सेवा देखील केली.

पेडणे सर्विस रस्त्यावर आज एक सॉफ्ट ड्रिंकने भरलेला ट्रक उलटल्याची घटना घडली. मात्र सुदैवाने या अपघातात कोणतीही जीवितहानी झाली नाही.

झारखंडमधील एका स्थलांतरित कामगाराला कुडचडे येथे रस्त्याच्या कडेला बेकायदेशीररित्या कचरा टाकताना स्थानिक तरुण प्रबल वस्ता यांनी रंगेहाथ पकडले. त्यानंतर त्या कामगाराला पुढील कारवाईसाठी तात्काळ कुडचडे पोलिसांच्या स्वाधीन करण्यात आले.

गोव्यातील पर्पल फेस्ट ०९ ते १२ ऑक्टोबर दरम्यान आयोजित करण्यात येणार आहे. अशी माहिती राज्याचे समाज कल्याण मंत्री सुभाष फळदेसाई यांनी दिली आहे.

मद्यधुंद अवस्थेत असलेल्या १७ वर्षीय अल्पवयीन मुलाच्या कारने दुचाकीला साखळी येथे जोराची धडक दिली. यात दुचाकी चालक गंभीर जखमी झाला आहे. कारचालक मुलगा आणि इतर दोघांनी घटनास्थळावरून पळ काढला. पोलिसांनी त्यानंतर सर्वांना ताब्यात घेऊन न्यायालयासमोर हजर केले जाणार आहे.

कोलवा येथे बैलांची बेकायदेशीर झुंज आयोजित केल्याप्रकरणी लियाकत अली शेख आणि कोणसेसाव रॉड्रिग्ज यांच्याविरोधात कोलवा पोलिसांनी गुन्हा नोंद केला आहे. बेताळभाटी येथे खुल्या मेदानात ही झुंज आयोजित करण्यात आली होती. प्राण्यांविरोधात क्रूरता केल्याप्रकरणी दोघांविरोधात गुन्हा नोंद करण्यात आला आहे.