महामार्गांवरील अपघातग्रस्तांना तात्काळ वैद्यकीय मदत मिळावी, यासाठी गोवा आरोग्य विभागाने आपत्कालीन केंद्र स्थापन करण्यासह महामार्गांवर रुग्णवाहिका तैनात करण्यात येणार आहेत. सरकार याबाबत काम करत असल्याची माहिती मंत्री विश्वजित राणे यांनी सभागृहात दिली.

सभागृहात मांडण्यात आलेल्या लेखी उत्तरात राणे यांनी याबाबत माहिती दिली. आरोग्य विभागामार्फत आपत्कालीन देखभाल केंद्र उभारण्यासह आणि महामार्गांवर रुग्णवाहिका तैनात करण्याची प्रक्रिया सुरु आहे, असे राणे यांनी म्हटले आहे.

'आरोग्य विभागाने 09 कार्डियाक केअर ॲम्ब्युलन्स आणि दोन निओ नेटल ॲम्ब्युलन्स देखील खरेदी केल्या आहेत आणि 17 अतिरिक्त ॲडव्हान्स लाइफसेव्हिंग ॲम्ब्युलन्सच्या खरेदीची प्रक्रिया सुरू आहे,' अशी माहिती राणे यांनी सभागृहात दिली.

आरोग्य विभागाच्या वतीने नवीन रुग्णवाहिका खरेदी करण्याची प्रक्रिया सुरु असून, रुग्णवाहिकांचा ताफा वाढवणार आहे. रुग्णवाहिका अधिक असल्यास पीडितांपर्यंत पोहोचण्याचा प्रतिसाद वेळ कमी होण्यास मदत होणाराय.

108 रुग्णवाहिका वेळेत पोहोचली नाही किंवा सेवा मिळाली नाही अशा काही तक्रारी प्राप्त झाल्या का याबाबत उत्तर देताना राणे यांनी 108 रुग्णवाहिका सेवेबाबत गेल्या तीन वर्षात 23 तक्रारी प्राप्त झाल्याची माहिती दिली.