पर्वरी: गोव्यात रॉटव्हिलर, पिटबुल कुत्र्यांवर बंदी घालण्यासाठी विधेयक सादर केले जाणार आहे. तसेच, राज्यात उभारल्या जाणाऱ्या भारतरत्न डॉ. बाबासाहेब आंबेडकर भवनासाठी पर्वरीत २,०४० चौरस मीटर जागा मंजूर करण्यात आल्याची माहिती राज्याचे मुख्यमंत्री डॉ. प्रमोद सावंत यांनी दिली आहे. याशिवाय विविध महत्वाचे निर्णय मंत्रिमंडळाच्या बैठकीत घेण्यात आले.

मंत्रिमंडळाच्या बैठकीनंतर मुख्यमंत्री प्रमोद सावंत यांनी प्रसार माध्यमांशी संवाद साधला. यावेळी वाहतूक मंत्री माविन गुदिन्हो उपस्थित होते.

मंत्रिमंडळाच्या बैठकीत घेण्यात आलेले काही महत्वाचे निर्णय

१) Ease Of Doing Business साठी मंत्री माविन गुदिन्हो यांच्या दुरुस्ती विधेयक सादर केले जाणार

२) गोवा लोकसेवा आयोगाचा अहवाल २०२४ -२५ मंत्रिमंडळासमोर सादर केला असून, तो अधिवेशनात मांडला जाईल.

३) आरोग्य खात्यात नवीन भरती (१७० डॉक्टर आणि नर्स यांची कंत्रीटी भरती)

४) रॉटव्हिलर आणि पिटबुल यासारख्या पाळीव श्वानांवर बंदीबाबत निर्णय घेण्यासाठी विधेयक सादर केले जाणार

५) बाबासाहेब आंबेडकर भवनसाठी पर्वरीत २,०४० चौ. मीटर जागेची मंजुरी

६) गोवा दंत महाविद्यालयातील विविध पदांसाठीच्या भरतीसाठी मान्यता (१० कंत्राटी डॉक्टर)

७) पर्यावरण व हवामान बदल खात्यात नव्या पदाच्या निर्मितीस मान्यता

८) एनसीडीएससाठी तुये येथे जागेसाठी मंजुरी

९) बंदर कप्तान व नदी परिवहन आता वेगवेगळी खाली असतील

१०) राष्ट्रीय सेवा योजना (एनएसएस) या स्वतंत्र विभागाची स्थापना

गोवा वाहतूक अ‍ॅग्रीगेटर अ‍ॅप बाबत काही निर्णय घेण्यात आला का याबाबत मुख्यमंत्री प्रमोद सावंत यांना विचारणा करण्यात आली, त्यावेळी राज्यातील टॅक्सी चालक आणि सरकार एकाच पानावर असून, योग्यवेळी योग्य निर्णय घेतला जाईल, अशी माहिती त्यांनी दिली. तसेच, २१ जुलैपासून गोवा विधानसभेचे पावसाळी अधिवेशन सुरु होईल, असे सावंत म्हणाले.