सांगे येथील पार्किंग समस्या जटिल होत चालली आहे. बाजार व सरकारी कार्यालये एकाच ठिकाणी असल्यामुळे तसेच छोटा बस स्थानकाही येथे असल्याने वाहनाची मोठी गर्दी होते. त्यामुळे बसस्थानकावरील पार्किंगची जागा अपुरी पडत आहे. पालिकेला ही समस्या सोडविण्यास अद्याप यश आलेले नाही, यामुळे वाहनचालक संताप व्यक्त करीत आहेत.

बस स्थानकाच्या चारी बाजूने दुकाने तसेच मागे सरकारी कार्यालये असल्यामुळे येथे नेहमीच गर्दी असते. गाड्या पार्किंगसाठी पुरेशी जागा उपलब्ध नसल्याने अनेकजण कुठेही वाहने उभी करतात, त्यामुळे समस्येत अधिक भर पडते. त्यात बसस्थानकावर प्रवासी बसगाड्या कशाही उभ्या केल्या जातात. काही गाड्या तासन्तास पार्क करून ठेवल्या जातात.

येथील चार चाकी व दुचाकी पार्किंग अशी सोय केली असली तरी ही जागा अपुरी पडत आहे. त्यामुळे बसस्थानकावर तासन्तास जागा अडवणाऱ्या बसगाड्यांना अन्यत्र हलवण्यात याव्यात. तसेच फक्त पाच मिनिटेच बसगाडीला थांबा घेण्यास मुभा द्यावी, अशी मागणी जोर धरत आहे. त्यामुळे अन्य वाहनांना काही प्रमाणात पार्किंगसाठी जागा उपलब्ध होऊ शकते, असे नागरिकांचे म्हणणे आहे.

पालिकेकडे पार्किंगसाठी स्वतंत्र जागा नाही. वाढत्या वाहनांमुळे छोट्या बस स्थानकातील जागाही अपुरी पडत आहे. पालिकेने याबाबत आता गंभीरपणे विचार करणे आवश्‍यक आहे, असे वाहनचालकांचे म्हणणे आहे.