Sanguem Police Station: ताडपत्रीच्या भरवश्यावर पोलिस स्थानक; उद्धाराच्या प्रतीक्षेत

सांगे पोलिस स्थानक हे राज्‍यातील एका सर्वांत जुन्या व जीर्ण वास्तूत आजही सुरू आहे. पावसाळ्‍यात तेथे गळती लागते. त्‍यामुळे सध्‍या या इमारतीच्‍या छपरावर प्लास्टिकचे आच्‍छादन घालण्यात आले आहे.

तेथे नवीन इमारत बांधण्‍यात येणार असे कित्‍येक वर्षांपासून सांगण्‍यात येत असले तरी अद्याप कोणतीही हालचाल दिसून येत नाही. या पोलिस स्थानकात पोलिस कोठडी, आर्मरूम, कार्यालय, पोलिस कर्मचाऱ्यांना विश्रांती घेण्यासाठी दाटीवाटीने निर्माण केलेली खोली, महिला कर्मचाऱ्यांसाठी खोली, भोजन तयार करण्यासाठी खोली, वायरलेस कक्ष हे सर्व कसेबसे सजविण्यात आले आहे.

प्रशस्त अशी मोकळी जागा कुठेच दिसून येत नाही. उभे राहण्यासाठीही पुरेशी जागा नाही. या वास्तूच्या ठिकाणी नवीन वास्तू उभी केल्यास बऱ्याच त्रुटी भरून काढता येणे शक्य आहे. वायरलेस कक्ष, वाहतूक पोलिस, सीआयडी कक्ष, कँटीन, लोकांसाठी स्वतंत्र तक्रार निवारण कक्ष, कर्मचारी निवास अशा अनेक गोष्टी करता येणे शक्य आहे. पण नव्या वास्तूला अगोदर मुहूर्त मिळणे गरजेचे आहे.