Bicholim News :

डिचोली, तब्बल चार वर्षांनंतर मयेवासियांसह तमाम भाविकांचे लक्ष लागून राहिलेल्या मये येथील श्री माया केळबाई पंचायतन देवस्थानची प्रसिद्ध ''माल्या''ची जत्रा अखेर उत्साहात साजरी झाली. जत्रा सुरळीतपणे साजरी झाल्याने 'माले' पेटले आणि देवीचा 'पण' ही पूर्ण झाला.

मंगळवारी सुरु झालेल्या या जत्रेची बुधवारी पहाटे हजारो भक्तगणांच्या साक्षीत परंपरेप्रमाणे कोणत्याही विघ्नाशिवाय उत्साहात सांगता झाली.

मान आणि अधिकाराच्या मुद्यावरुन गेल्या काही वर्षांपासून या देवस्थानचे प्रमुख उत्सव वादाच्या विळख्यात अडकले आहेत. यंदा तर देवस्थानचा कळसोत्सव सुरवातीलाच रद्द करण्याची वेळ आली होती. त्यामुळे ''माल्या''च्या जत्रेविषयी अनिश्चितता निर्माण झाली होती.

माल्याच्या जत्रेच्या तोंडावर ही जत्रा रद्द करण्याचा निर्णय देवस्थान समितीने घेतला होता. त्यातच ''पेठ''च्या पूर्वापार परंपरेत खंड पडला होता.

त्यामुळे जत्रेबाबत प्रश्नचिन्ह निर्माण झाले होते. मात्र ही जत्रा अखेर एकदाची साजरी झाली. पोलिस बंदोबस्तही यावेळी तैनात होता. कोणताही अनुचित प्रकार घडला नाही.या जत्रेत भाविक मोठ्या संख्येने सहभागी झाले होते.

...अन् देवीची 'पण'पूर्ती

परंपरेप्रमाणे मध्यरात्री मुळगावचे धोंड आणि इतर भक्तगण मये गावात आले. अन्य मानकरी येताच 'पेठ' मुळगावला जाण्यासाठी मार्गस्थ झाली. दरम्यान केळबाई देवीची 'पेठ' महामाया मंदिरापाशी नेण्यात आली. पहाटे 'माले' प्रज्वलित करून मोडाच्या डोक्यावर ठेवण्यात आल्यानंतर अवसारासह 'माले' नृत्याचा थरार सुरु झाला. त्यामुळे श्री केळबाई देवीचा ''पण'' ही पूर्ण झाला. ''माले''उत्सव झाल्यानंतर परंपरेप्रमाणे या जत्रोत्सवाची सांगता झाली.

पोलिस बंदोबस्त

जत्रेवेळी कायदा आणि सुव्यस्थेचा प्रश्न निर्माण होऊ नये, त्यासाठी पोलिस बंदोबस्त ठेवण्यात आला होता. डिचोलीचे उपजिल्हाधिकारी रमेश गावकर परिस्थितीवर लक्ष ठेवून होते. आमदार प्रेमेंद्र शेट यांनीही जत्रेत सहभाग घेतला होता.

'पेठ' परंपरेत खंड, तरीही...

मुळगाव येथून देवीची पेठ मये येथील श्री केळबाई देवीच्या मंदिरात आल्यानंतर पारंपरिक विधी करण्यात येतात. त्यानंतर मयेतील देवीची पेठ मिळून दोन्ही पेठ चव्हाटा या स्थानी नेण्याची परंपरा आहे.

गेल्या रविवारी पहाटे मुळगाव येथील देवीची पेठ मयेत आली होती. मात्र मंदिरात न जाता प्रवेशद्वारावरूनच परस्पर चव्हाटा या स्थानी गेली होती. त्यानंतर नाईक गटातील लोकांनी कौल घेऊन श्री केळबाई देवीची पेठ चव्हाटा या ठिकाणी नेऊन स्थानापन्न केली होती.