पणजी: देवस्थानांच्या निवडणुका मुक्त, निष्पक्ष आणि शांततापूर्ण वातावरणात पार पडाव्यात यासाठी कायदा आणि सुव्यवस्थेच्या अनुषंगाने देवस्थानांच्या प्रशासकांना निर्देश जारी करण्यात आले होते. मात्र, रविवारी (दि. ९ फेब्रुवारी) काही ठिकाणी निवडणुकीवर बहिष्कार घालण्यात आला. साळ आणि मये येथील मिळून दोन देवस्थानांच्या निवडणुका स्थगित करण्यात आल्या, तहापि, बऱ्याच देवस्थानांमध्ये समित्यांची बिनविरोध निवड करण्यात आली.

साळ येथील श्री महादेव भूमिका देवस्थानच्या अध्यक्ष पदावरून वाद निर्माण झाला, तर मये येथील श्री माया केळबाय देवस्थानच्या निवडणूक प्रक्रियेस हरकत घेण्यात आली. साळ येथील श्री महादेव भूमिका देवस्थानच्या निवडणुकीवेळी सुरवातीपासूनच गदारोळ निर्माण झाला.

अध्यक्षपदाच्या मुद्यावरून आज वातावरण तापले होते. दुपारी उशिरापर्यंत निवडणूक प्रक्रिया पूर्ण झाली नव्हती. कायदा आणि सुव्यवस्थेचा प्रश्न निर्माण होता कामा नये, यासाठी पोलिस बंदोबस्त तैनात करण्यात आला होता.

देवालयांचे प्रशासक आदी अधिकारी साळ येथील परिस्थितीवर नजर ठेवून होते, देवस्थानचे प्रशासक तथा डिचोलीचे मामलेदार यांनी या वृत्तास दुजोरा देताना साळमधील स्थिती नियंत्रणात असल्याचे स्पष्ट केले.

श्रीनिवास धेंपे बिनविरोध

महालक्ष्मी देवस्थान समितीची निवडणूक बिनविरोध निवड झाली. अध्यक्षपदी उद्योगपती श्रीनिवास धेंपे, तर सचिवपदी महेश कांदोळकर, खजिनदारपदी गौरव धोंड आणि मुखत्यारपदी नारायण मांद्रेकर यांची निवड झाली.

श्री लईराई देवस्थानच्या अध्यक्षपदी गावकर

लाखो भक्तांचे श्रद्धास्थान असलेल्या शिरगाव येथील श्री लईराई देवस्थानच्या अध्यक्षपदी दीनानाथ शांबा गावकर यांची निवड झाली. मावळते अध्यक्ष गणेश चंद्रकात गावकर यांच्या अध्यक्षतेखाली देवस्थान सभागृहात ही सभा घेण्यात आली. निवडणूक प्रक्रिया सुरळीत आणि शांततेत पार पडली