पणजी: राज्‍यातील सरकारी मराठी आणि कोकणी शाळांमध्‍ये शिक्षकांची रिक्त पदे भरण्‍यासाठी कर्मचारी भरती आयोगाने घेतलेल्‍या सीबीटी–१ परीक्षेनंतर सीबीटी–२ साठी पात्र ठरलेल्‍या ७६० जणांची यादी आयोगाने जारी केली आहे. या शाळांमध्‍ये ३९० पदे भरण्‍यात येणार आहेत.

मराठी शाळांतील शिक्षकांची पदे भरण्‍यासाठी घेण्‍यात आलेल्‍या सीबीटी–१ मध्‍ये उत्तीर्ण ठरून सीबीटी–२ साठी पात्र ठरलेल्‍यांत खुल्‍या वर्गातील ५५३, अनुसूचित जमातीतील (एसटी) ४४, इतर मागासवर्गीयांतील (ओबीसी) ५०, अनुसूचित जातीतील (एससी), ७, आर्थिक मागास गटातील (ईडब्‍ल्‍यूएस) ५ आणि क्रीडा गटातील एका उमेदवाराचा समावेश आहे.

तर, कोकणी शाळांतील शिक्षक भरतीसाठी घेण्‍यात आलेल्‍या सीबीटी–१ मधून खुल्‍या गटातून ६७ आणि ओबीसींमधून ३३ उमेदवार सीबीटी–२ साठी पात्र ठरलेले आहेत.

दरम्‍यान, राज्‍यातील सरकारी मराठी आणि कोकणी शाळांमध्‍ये पूर्णपणे शिक्षकांची मोठ्या प्रमाणात वाणवा भासत होती. त्‍यामुळे रिक्त पदे भरण्‍यासंदर्भातील प्रस्‍ताव शिक्षण खात्‍याने कर्मचारी भरती आयोगाला सादर केलेला होता. त्‍यानुसार आयोगाने यासंदर्भात सीबीटी–१ घेतली असून, सीबीटी–२ परीक्षाही लवकरच घेण्‍यात येणार आहे.