फोंडा, येथील सुपष विकास चोडणकर याने जेईई मेन परीक्षेमध्ये राज्यात प्रथम क्रमांक पटकावला.
सुपषच्या या यशाचे फोंड्यातील नागरिकांकडून कौतुक केले जात असून अलीकडच्या काळात अशाप्रकारची कामगिरी करणारा सुपष फोंड्यातील पहिलाच विद्यार्थी ठरला आहे. नॅशनल टेस्टिंग एजन्सी अर्थात एनटीएतर्फे सुपष हा जेईईमध्ये अव्वल ठरल्याचे घोषित करण्यात आले. सुपषने ९९.९४ टक्के गुण संपादन केले.
एस्टेलर उच्च माध्यमिक विद्यालयाचा विद्यार्थी असलेल्या सुपष चोडणकर याने सातत्याने मन लावून अभ्यास करून हे यश संपादन केले आहे.
सुपषने आपल्या यशाचे श्रेय आई-वडील तसेच गुरुजनांना दिले आहे. आपल्याला पुढील शिक्षण हे अभियांत्रिकी क्षेत्रातून किंवा संशोधन क्षेत्रातून मिळवायचे असल्याचे सुपष चोडणकर म्हणाला.
दरम्यान, सुपष चोडणकर हा राज्यातील अव्वल असलेल्या गोवा अभियांत्रिकी महाविद्यालयाचे असोसिएट प्राध्यापक असलेल्या विकास चोडणकर तसेच दीपा यांचा पुत्र असून अभ्यासात सातत्य आणि एकाग्रता राखली तर यश हमखास मिळू शकते, असे प्रा. विकास चोडणकर म्हणाले.
चोडणकर दाम्पत्याला दोन पुत्र असून ज्येष्ठ पुत्र रौनक हा सध्या गोवा वैद्यकीय दंतचिकित्सा महाविद्यालयात शिकत असून दुसऱ्या पुत्राचा ओढा हा अभियांत्रिकी शिक्षणाकडे असल्याचे विकास चोडणकर म्हणाले.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.