पेडणे: मोपा येथील मनोहर आंतरराष्ट्रीय विमानतळावर आयोजित ‘गोवा स्ट्रीट रेस’ (फॉर्म्युला ४) कार स्पर्धेला शनिवारी (ता.१४) दुपारी प्रारंभ झाला. राज्यातील पहिल्याच अशा स्पर्धेला प्रेक्षकांचा चांगला प्रतिसाद लाभला. मात्र, तीन किरकोळ अपघातांची नोंद झाली.

पहिल्या दोन अपघातांत एका कारने पुढील कारला मागून धडक दिली, तर तिसरा अपघात ओव्हरटेकच्या प्रयत्नात दोन कारमध्ये झाला. अपघातग्रस्त वाहने तातडीने क्रेनद्वारे हटविण्यात आली.

कार रेससोबत मोटरसायकलस्वारांनी कसरती सादर करून प्रेक्षकांचे मनोरंजन केले. स्पर्धेमुळे पर्यटनाला चालना मिळेल, असा सरकारचा दावा असला तरी विदेशी पर्यटकांची उपस्थिती अल्प होती. दरम्यान, कार्यक्रमाच्या नियोजनाबाबत नाराजी व्यक्त करण्यात आली. सकाळी होणारा कार्यक्रम दुपारी एक वाजता सुरू झाला. स्वयंसेवकांकडून पुरेशी माहिती न मिळाल्याने प्रेक्षकांची गैरसोय झाली. काही ठिकाणी कच्च्या रस्त्यांमुळे चिखलाची समस्या जाणवली.

पत्रकारही नाराज

पत्रकारांसाठी करण्यात आलेल्या आसनव्यवस्थेबाबतही स्थानिक माध्यम प्रतिनिधींनी नाराजी व्यक्त केली. त्यांच्या मते, वृत्तांकन व छायाचित्रणासाठी जागा अपुरी व अडथळायुक्त होती. आयोजकांकडून मात्र यावर समाधानकारक स्पष्टीकरण मिळाले नाही.