पणजी: सरकारच्या उच्च शिक्षण संचालनालयातर्फे देण्यात येणाऱ्या राज्य शिक्षक पुरस्काराचे वितरण 20 रोजी सकाळी 10 वा. गोवा विद्यापीठाच्या (Goa University) मल्‍टिपर्पज अ‍ॅडोटोरियम न्यू सायन्स फॅकल्टी, स्कूल ऑफ केमिकल सायन्स कॅम्पसमध्ये होणार आहे.

या पुरस्कार वितरण कार्यक्रमाला मुख्यमंत्री प्रमोद सावंत (Pramod Sawant) आणि सभापती राजेश पाटणेकर (Rajesh Patnekar) यांची उपस्थिती असणार आहे. त्यांच्याहस्ते शिक्षकांना 20 रोजी गौरविण्यात येईल. कोविड-19 (COVID-19) महामारीमुळे विलंब झालेला हा सोहळा 20 डिसेंबर रोजी घेण्यात येत आहे. कोविड महामारी काळातही शिक्षकांनी उल्लेखनीय कार्य केले आहे. लसीकरण केंद्रावर काही शिक्षकांना तैनात केले आहे. सध्‍या निवडणूक मोहिमेचीही जबाबदारी त्‍यांच्‍यावर सोपविली आहे.

असा आहे उद्देश

गोव्याला नॉलेज हब बनविण्यात शिक्षकांची भूमिका अत्यंत महत्त्वाची आहे, हे ओळखून उच्च शिक्षण संचालनालयाने राज्यातील प्रतिभावान आणि समर्पित शिक्षकांचा गौरव करण्याच्या दृष्टीने राज्य शिक्षक (Teacher) पुरस्काराची (Award) आखणी केलेली आहे. या पुरस्कारामुळे राज्यातील शिक्षकांच्या पुढच्या पिढीला ज्ञानावर आधारीत समाज निर्माण करण्यासाठी प्रेरणा मिळेल, या उद्देशापोटी हे पुरस्कार देण्यात येत आहेत.

असे आहे पुरस्काराचे स्वरूप

दरवर्षी उच्च शिक्षणात भरीव योगदान देणाऱ्या शिक्षकांची निवड राज्य शिक्षक पुरस्कारासाठी केली जाते. 1लाख रुपये, प्रशस्‍तिपत्र आणि स्मृतिचिन्ह असे या पुरस्काराचे स्वरूप आहे.