पणजी: मराठी, कोकणी शिक्षकांसह रेंज फॉरेस्‍ट अधिकारी अशा ४०३ पदांसाठी येत्‍या १० मे रोजी सीबीटी २ आणि ३ परीक्षा आयोजित करण्‍याचा निर्णय राज्‍य कर्मचारी भरती आयोगाने घेतला आहे. त्‍यासंदर्भातील नोटीसही सोमवारी जारी करण्‍यात आली आहे.

कर्मचारी भरती आयोगाने मराठी शिक्षकांची ३५२, कोकणी शिक्षकांची ३८, तर रेंज फॉरेस्‍ट अधिकाऱ्यांची १३ अशी मिळून ४०३ पदे भरण्‍याचा निर्णय काही दिवसांपूर्वी घेतलेला होता. या पदांसाठी येत्‍या १० मे रोजी सीबीटी १ आणि २ या परीक्षा घेण्‍यात येणार असल्‍याचे आयोगाने म्‍हटले आहे.

उमेदवारांना १ मे रोजी ई-प्रवेशपत्र देण्‍यात येईल. तसेच परीक्षा केंद्रांबाबतची सविस्तर माहिती आयोगाच्या संकेतस्थळावर उपलब्ध करण्‍यात येईल. उमेदवाराने परीक्षा केंद्र किंवा परीक्षेची वेळ बदलण्याबाबत केलेली कोणतीही विनंती आयोग स्वीकारणार नाही, असेही नोटिशीत म्‍हटले आहे.

३० उमेदवारांचे अर्ज रद्द!

माहिती साहाय्यक या पदांसाठी अर्ज केलेल्या ३० उमेदवारांचे अर्ज त्‍यांच्‍या विनंतीनुसार रद्द करण्‍यात आले असून, त्यांना परीक्षा शुल्क रक्कमही परत करण्यात आली आहेत, अशी नोटीसही कर्मचारी भरती आयोगाने सोमवारी जारी केली आहे.