ST Reservation: अनुसूचित जमातीला विधानसभा निवडणुकीत राजकीय आरक्षण मिळावे,या मागणीसाठी एसटी नेत्यांनी आजपासून आझाद मैदानावर आज बुधवारपासून साखळी उपोषणाला प्रारंभ केला.

रविवारी एसटी नेत्यांनी सरकारला आरक्षणासंबंधीची अंतिम अधिसूचना जारी करण्यासाठी 48 तासांचा अल्टिमेटम दिला होता.

या संदर्भात सरकारकडून कोणतीच हालचाल होत नसल्याचे पाहून संतप्त एसटी नेत्यांनी आझाद मैदानावर उपोषणाला सुरूवात केली. दरम्यान, केंद्रीय मंत्री श्रीपाद नाईक यांनी आंदोलनस्थळी भेट देऊन आंदोलकांशी चर्चा केली.

यावेळी त्यांनी यासंदर्भात मुख्यमंत्री डॉ.प्रमोद सावंत यांच्याशी चर्चा करू,असे आश्‍वासन दिले. तसेच सरकारला याबाबतीत निर्णय घेण्यास काहीकाळ लागू शकतो,त्यामुळे एसटी नेत्यांनी समजून घ्यावे,असेही सांगितले.

गोव्यातील अनुसूचित जमातीसाठीच्या (एसटी) राजकीय आरक्षणाची अधिसूचना केंद्र सरकारने जारी न केल्यास पणजीतील आझाद मैदानावर येत्या 6 मार्चपासून उपोषण छेडण्याचा इशारा मिशन पॉलिटिकल फॉर एसटी रिझर्व्हेशन संघटनेचे सरचिटणीस रुपेश वेळीप यांनी दिला होता.

केंद्र व राज्य सरकारकडून वारंवार आश्‍वासने देऊन फसवणूक केली जात असल्याचा आरोपही त्यांनी केला होता.