WTT Star Contender Goa 2024: डब्ल्यूटीटी स्टार कंटेंडर 2024 टेबल टेनिस स्पर्धेतील मोहिमेला भारतीय खेळाडू मानव ठक्कर व अहिका मुखर्जी यांनी विजयाने सुरवात केली, मात्र अनुभवी अचंता शरथ कमल याच्यासह सनील शेट्टी याला पराभवाचा धक्का बसला.

स्पर्धेला मंगळवारपासून पेडे-म्हापसा येथील क्रीडा संकुलात सुरवात झाली. पुरुष एकेरीत मानव ठक्कर याने अंशुमन अगरवाल याचा ३-० (११-७, ११-४, ११-४) असा पराभव केला.

महिला एकेरी गटात अहिका मुखर्जीने सायली वाणी हिच्यावर ३-० ( ११-९, ११-२, १२-१०) अशा फरकाने मात केली. आणखी एक लढतीत पोयमंती बैस्याने पहिल्या फेरीत प्रिथा प्रिया वर्टिकर हिला ३-० ( १२-१०, ११-७, ११-७) असे नमविले.

पुरुष एकेरीतील पात्रता फेरीत अचंता शरथ कमल याला दक्षिण कोरियाच्या कांग डोंगसू याने ३-२ (६-११, १०-१२, ११-४, १७-१५, ११-३) असे कडव्या झुंजीनंतर नमविले. सनील शेट्टी यालाही अल्जेरियाच्या मेहदी बौलौस्सा याच्याकडून ३-२ (१४-१२, ११-९, ११-१३, ७-११, ११-६) अशी निसटती हार पत्करावी लागली.

मानुष-दिया जोडीचा विजय

मिश्र दुहेरी गटात मानुष शाह आणि दिया चितळे या भारतीय जोडीने सिंगापूरच्या क्वेक इझाक आणि झोऊ जिंगयी जोडीचा ३-० (११-४, ११-७, ११-६) असा, तर श्रीजा अकुला आणि स्नेहित सुरवाज्जुला जोडीनेही सिंगापूरच्या पॅंग कोएन व वाँग रू या इंडोनेशियन जोडीचा ३-१ (११-९, १३-११, ७-११, ११-८) असे नमविले.