Blitz Chess Games: गोव्याचा सर्वांत युवा इंटरनॅशनल मास्टर (आयएम) बुद्धिबळपटू एथन वाझ याने कारकिर्दीतील पहिले सीनियर पदक जिंकण्याचा पराक्रम साधला.

महाराष्ट्रातील नाशिक येथे झालेल्या स्पर्धेत बारा वर्षीय खेळाडूने ब्लिट्झ प्रकारात ब्राँझपदक पटकावले, तर रॅपिड प्रकारात पोडियम मिळवताना 11 व्या क्रमांकाचे बक्षीस प्राप्त केले.

स्पर्धेत विविध राज्यांतील खेळाडूंचा सहभाग आहे. रॅपिड प्रकारात 230 खेळाडू होते, त्यापैकी 55 जण मानांकित होते. ब्लिट्झ प्रकारात 224 पैकी 59 बुद्धिबळपटू मानांकित होते.

ब्लिट्झ प्रकारात एथनने 11 फेऱ्यांतून नऊ गुणांची कमाई केली. त्याने आठ डाव जिंकले, दोन बरोबरीची नोंद केली, तर एका डावात पराभूत व्हावे लागले. ग्रँडमास्टर दिप्तयन घोष याने साडेनऊ गुणांसह विजेतेपद पटकावले.

एथन व आर. ऋत्विक राजा यांचे समान नऊ गुण झाले. ऋत्विक याला चांगल्या टायब्रेकर गुणांमुळे उपविजेतेपद मिळाले, तर एथनला तिसऱ्या क्रमांकावर समाधान मानावे लागले.