Goa News: सडये तसेच मार्ना-शिवोली या दोन्ही गावांना जोडणारा पोर्तुगीजकालीन जोडरस्ता व तेथील बांधाच्या दुरुस्तीचे काम लवकरच हाती घेण्यात येणार असून त्यासाठी खुद्द मुख्यमंत्री शिवोलीत उपस्थित राहाणार असल्याचे शिवोलीच्या आमदार दिलायला लोबो यांनी शिवोलीत सांगितले.

येथील पोर्तुगीजकालीन जोडरस्ता या भागातील वाहतुकीसाठी महत्त्वाचा असा दुवा असून सध्याच्या दुरवस्थेमुळे वाहतुकीबरोबरच या भागातील हजारो हेक्टर शेतजमीन पडिक बनल्याचे लोबो यांनी यावेळी सांगितले.

मार्ना-शिवोली येथील शेतकऱ्यांना मळणीसाठी मोफत यंत्राचे उद्‌घाटन केल्यानंतर लोबो बोलत होत्या. यावेळी पंचसदस्य संदेश हडफडकर, अमित मोरजकर, माजी सरपंच सिल्वेस्टर फर्नांडिस तसेच शेतकरी मोठ्या संख्येने उपस्थित होते.

दरम्यान, सडये तसेच शिवोली जोडरस्त्यासाठी एकूण सहा कोटींहून अधिक निधी मुख्यमंत्री डॉ. प्रमोद सावंत यांच्याकडून मंजूर करण्यात आलेला असून येत्या महिन्याभरात येथील कामाचा शुभारंभ मुख्यमंत्र्यांच्या हस्ते करण्यात येणार असल्याचे लोबो यांनी सांगितले.

विधानसभा निवडणुकीच्या आधी दिलेल्या आश्वासनांप्रमाणे यंदाही शिवोली मतदारसंघातील एकूण सहाही पंचायतींत मळणी यंत्रांची मोफत सेवा देण्यात येणार असून राहिलेल्या पडिक शेतजमिनी शेती लागवडीखाली आणण्याचा प्रामाणिक प्रयत्न करणार असल्याचे त्यांनी पुढे सांगितले.