वास्को: गोवा शिपयार्डने भारतीय तटरक्षक दलासाठी बांधलेल्या ‘अजित’ व ‘अपराजित’ या द्रुतगती गस्ती जहाजांचे जलावतरण नुकतेच एका भव्य सोहळ्यात मंजू शर्मा यांच्या हस्ते करण्‍यात आले.

‘आत्मनिर्भर भारत’ अभियानांतर्गत गोवा शिपयार्डने भारतीय तटरक्षक दलासाठी तयार केलेल्या आठ जहाजांच्या मालिकेतील ही सातवी व आठवी जहाजे असून, संरक्षण उत्पादनातील भारताच्या वाढत्या स्वावलंबनाचे हे उदाहरण आहे.

या सोहळ्याला संरक्षण सेवेत कार्यरत आर्थिक सल्लागार मयंक शर्मा प्रमुख पाहुणे म्हणून उपस्थित होते. तसेच गोवा शिपयार्डचे अध्यक्ष व व्यवस्थापकीय संचालक ब्रजेश कुमार उपाध्याय, गोवा तटरक्षक दलाचे महानिरीक्षक भीष्म शर्मा, गोवा विभागाचे प्रमुख मनोज भाटिया यांच्यासह भारतीय तटरक्षक दल, नौदल आणि शिपयार्डचे वरिष्ठ अधिकारी उपस्थित होते.

मयंक शर्मा यांनी गोवा शिपयार्डच्या कामगिरीचे कौतुक केले. ब्रजेश कुमार उपाध्याय यांनी शिपयार्डच्या प्रगतीचा आढावा घेत सांगितले की, गोवा शिपयार्डचा प्रगती आलेख सातत्याने उंचावत असून, ‘मेक इन इंडिया’च्या दृष्‍टिकोनाशी सुसंगत अशी वाटचाल सुरू आहे.

जहाजांची वैशिष्ट्ये

नाव : ‘अजित’ व ‘अपराजित’

लांबी : ५२ मीटर

विस्थापन : ३२० टन

विशेषता : कंट्रोलेबल पिच प्रोपेलर्स, उच्च गती

कार्यक्षेत्र : किनारी संरक्षण, तस्करी व चाचेगिरीविरोधी कारवाया. शोध व बचाव मोहिमा.