पणजी: गोवा पर्यटन खात्‍यातर्फे आयोजित राज्‍यस्‍तरीय शिमगोत्‍सवास येत्‍या ५ मार्चपासून फोंड्यातून सुरू होणार आहे. राज्‍यातील नऊ ठिकाणी हा उत्‍सव साजरा करण्‍यात येणार आहे. त्‍यासाठीच्‍या साधनसुविधांसाठी देण्‍यात येणाऱ्या निधीत यंदा एक लाख रुपयांची वाढ करण्‍यात येणार असल्‍याची माहिती पर्यटन संचालक केदार नाईक यांनी दिली.

सोमवारी पणजीत घेतलेल्‍या पत्रकार परिषदेत नाईक बोलत होते. यावेळी गोवा पर्यटन विकास महामंडळाचे (जीटीडीसी) व्‍यवस्‍थापकीय संचालक कुलदीप आरोलकर आणि दीपक नार्वेकर उपस्‍थित होते.

दरम्‍यान, यंदा शिमगोत्‍सवातील रोमटामेळाचे आयोजन सायंकाळी ४ ते रात्री १० या वेळेतच करण्‍यात येणार आहे. यासंदर्भातील नियोजन खात्‍याकडून केले जात असल्‍याचे केदार नाईक यांनी स्‍पष्‍ट केले.

कुठे, कधी शिमगोत्‍सव?

फोंडा ५ मार्च, कळंगुट : ६, पणजी : ७, म्हापसा : ८, मांद्रे : ९, डिचोली : १०, साखळी : ११, शिरोडा व सांगे : १२, धारबांदोडा व कुंकळ्ळी : १३, मडगाव : १४, पर्वरी व वास्‍को : १५, कुडचडे व वाळपई : १६, केपे व काणकोण : १७, पेडणे : १८ मार्च.

पर्यटन खात्‍यातर्फे गेल्‍या काही वर्षांपासून राज्‍यस्‍तरीय शिमगोत्‍सवाचे आयोजन केले जात आहे. त्‍यासाठी प्रत्‍येक केंद्रात साधनसुविधा उभारण्‍यासाठी खात्‍यातर्फे लाखो रुपयांचा निधी दिला जातो. शिवाय आकर्षक बक्षिसेही देण्‍यात येतात. साधनसुविधा उभारण्‍यासाठी केंद्रांना देण्‍यात येणाऱ्या निधीत यंदा एक लाख रुपयांनी वाढ केली जाईल.

-केदार नाईक, पर्यटन संचालक