मडगाव: पुराचा धोका टाळण्यासाठी मडगावातून जाणारा पश्चिम बगल रस्ता सुरावली ते बाणावली या भागात स्टिल्ट (खांबा)वर बांधण्यासाठी ज्यांनी यापूर्वी या भागात पुराचा अनुभव घेतला आहे त्यांनी आपले अनुभव कथन करणारे व्हिडीओ पाठवावेत असे आता आवाहन करण्यात आले आहे. (Send video to build on West Bagal Road Stilt in Margao)

सदर भागात रस्ता मातीचा भराव घालून बांधावा की खांबावर पूल उभारून बांधावा याचा निर्णय घेण्यासाठी आठ वेगवेगळ्या प्राधिकरणाच्या तज्ञांची समिती नेमून निर्णय घ्यावा असा आदेश यापूर्वी राष्ट्रीय हरित लवादाने दिला होता.

या समितीला लोकांचं म्हणणे पटावे यासाठी आम्ही हा व्हिडीओ उपक्रम हाती घेतला असून लोकांनी आमच्या 94238 71526 या मदातवाहिनी क्रमांकावर ते अपलोड करावेत असे आवाहन या प्रकरणातील याचिकादार रॉयला फेर्नांडिस यांनी केले आहे.

फेर्नांडिस यांच्या दाव्याप्रमाणे सुरावली ते बाणावली या भागातून हा रस्ता जातो ते साळ नदीचे पाणलोट क्षेत्र असून जर तिथे मातीचा भराव घालून रस्ता उभारल्यास पाणी अडवून पूर येऊ शकतो तसेच या भागातील खारफुटीवरही त्याचा विपरीत परिणाम होणार आहे.