Goa Molestation Case शाळेतील विद्यार्थिनींशी अश्‍‍लील चाळे केल्‍याच्‍या आरोपाखाली अटक करण्‍यात आलेला पीई शिक्षक रमेश गावकर याने एका विद्यार्थिनीला ‘माझे म्‍हणणे ऐकले नाहीस तर अपहरण करीन’, अशी धमकी दिली होती, अशी नवी माहिती पोलिस तपासात पुढे आली आहे.
या आंबटशौकीन शिक्षकाने चार विद्यार्थिनींचा हात लावून विनयभंग केला असल्‍याची शक्‍यता विद्यार्थिंनींनी दिलेल्‍या जबानीतून स्‍पष्‍ट झाली आहे.
या प्रकरणात रमेश गावकर याला कुंकळ्‍ळी पोलिसांनी अटक केली असून शारीरिक शिक्षण खात्‍याने त्‍याला दोन दिवसांपूर्वीच सेेवेतून निलंबित केले आहे.
या प्रकरणात आतापर्यंत दहा विद्यार्थिनींची जबानी नोंद करून घेतली असून त्‍यापैकी चौघीजणींनी त्‍या शिक्षकाने आपल्‍याला हात लावला, असे सांगितले आहे. अन्‍य विद्यार्थिनींनी हा शिक्षक आपल्‍याकडे वाईट नजरेने पाहायचा, अशी जबानी पोलिसांत दिली आहे.
सेवेतून बडतर्फ करा : आवदा व्‍हिएगस या प्रकरणात पोलिसांना मदत करणाऱ्या वन स्‍टॉप केंद्राच्‍या आवदा व्‍हिएगस यांनी, हा प्रकार गंभीर स्‍वरूपाचा असून अशा शिक्षकांना फक्‍त निलंबित करून चालणार नाही, तर त्‍यांना सेवेतून बडतर्फ करण्‍याची गरज आहे, असे सांगितले.
वास्‍तविक शिक्षण खात्‍याने शिक्षकांची नियुक्‍ती करताना त्‍यांची मानसिक चाचणी करून ते विद्यार्थ्यांना हाताळण्‍यास सक्षम आहेत का, याची पाहणी करणे गरजेचे असल्‍याचे मत त्‍यांनी व्‍यक्‍त केले. या प्रकरणात शिक्षण खात्‍याने गंभीरपणे लक्ष घालावे, अशी मागणीही त्‍यांनी केली आहे.
गरीब विद्यार्थिनी ‘लक्ष्य’
रमेश गावकर हा गरीब घरातील विद्यार्थिनींना हेरून त्‍यांना मदत करण्‍याचे आश्‍वासन द्यायचा. अशा तऱ्हेने तो विद्यार्थिनींचे लक्ष आपल्‍याकडे वळविण्‍याचा प्रयत्‍न करत होता. ‘माझे म्‍हणणे ऐकल्‍यास तुम्‍हाला चैनीच्‍या वस्‍तू घेऊन देऊ’, असेही त्‍याने काही विद्यार्थिनींना सांगितले होते, अशी माहिती प्राप्‍त झाली आहे. या प्रकरणात कुंकळ्‍ळी पोलिस सखोल चौकशी करत आहेत.
Read Goa news in Marathi and Goa local news on Tourism, Business, Politics, Entertainment, Sports and Goa latest news in Marathi on Dainik Gomantak. Get Goa news live updates on the Dainik Gomantak Mobile app for Android and IOS.