डिचोली: सुटीनंतर पुन्हा शाळेची घंटा वाजायला दोन दिवस शिल्लक असल्याने सध्या सर्वत्र शालेय साहित्य खरेदी जोरात सुरू आहे. गेला आठवडाभर अवकाळी पावसाने कहर केल्यानंतर गेल्या तीन दिवसांपासून पावसाचा जोर कमी झाल्याने शालेय साहित्य खरेदी करण्यासाठी बाजारात गर्दी दिसून येत आहे.

पणजी, म्हापसा, फोंडा, मडगावसह तालुक्याच्या ठिकाणी मोठ्या प्रमाणात खरेदी सुरू झाली आहे. काही ठिकाणी वह्या व इतर साहित्याची सवलतीत विक्री केली जात आहे. बॅगा, छत्री, रेनकोटचे दर मात्र थोडे वाढलेले आहेत. रंग, दर्जानुसारानुसार ग्राहकांना किंमत मोजावी लागत आहेत. एप्रिल महिन्यात नवे शैक्षणिक वर्ष सुरू झाले, पण शालेय साहित्याची खरेदी खूपच कमी प्रमाणात करण्यता आली. राहिलेली खरेदी आत्ता जोरात सुरू आहे.

यंदा आकर्षक रेनकोट आणि छत्र्यांसह शालेय साहित्य बाजारात विक्रीस उपलब्ध झाले आहे. गेल्या काही दिवसांपासून बाजारात शालेय साहित्याची खरेदी सुरू झाली असली, तरी मागील दोन दिवसांपासून खरेदीला जोर आल्याचे दिसून येत आहे.

५ ते १० टक्के दरात वाढ!

बॅग्स, छत्र्या, रेनकोट या वस्तूंमागे किंचित म्हणजे ५ ते १० टक्के वाढ झाली आहे. त्यामुळे सामान्य पालकांच्या कपाळावर आट्या पडत आहेत. मुले तर आपल्या आवडीच्या वस्तूंसाठी हट्ट करताना दिसून येत आहेत.

मुलांच्या हट्टापायी पालकांनाही खिशाला कातर लावावी लागत आहे. आमच्या आस्थापनात शालेय साहित्य खरेदीवर सूट देण्यात येत आहे. त्यामुळे ग्राहकांकडून उत्स्फूर्त प्रतिसाद मिळत आहे, असे ‘वेन्सन’चे वाझ यांनी सांगितले.