पणजी: नवीन शिक्षण धोरणाच्या अनुषंगाने इयत्ता तिसरी पासून आठवीपर्यंतच्या सर्व विद्यार्थ्यांच्या परीक्षा या दोन सत्रांमध्ये आयोजित केल्या जाणार असून सत्रांत परीक्षेच्या प्रश्‍नपत्रिका, वेळापत्रक या गोवा राज्य शिक्षण संशोधन आणि प्रशिक्षण संस्था (जीएसईआरटी) द्वारे काढण्यात येणार आहेत.

प्रश्‍नपत्रिका जरी राज्यस्तरावर काढण्यात येणार असल्या आणि सर्वांच्या परीक्षा देखील एकाच वेळी होणार असल्या तरी उत्तर पत्रिका तपासणी तसेच गुणपत्रिका तयार करण्याची प्रक्रिया ही शालेय स्तरावर करण्यात येणार आहे. गुणपत्रिका कशा पद्धतीने करावी याची मार्गदर्शक सूचना जीएसईआरटी शाळांना करणार आहे.

या विषयांच्या प्रश्‍नपत्रिका

जीएसईआरटीद्वारे प्रमुख सैद्धांतिक विषय जसे की तीन भाषा, गणित, विज्ञान, समाज विज्ञान आणि वर्ल्ड अरांवड अस या विषयातील प्रश्‍नपत्रिका प्रामुख्याने एससीईआरटीद्वारे शाळांना पाठविण्यात येणार आहेत. त्यासोबतच कौशल्य आधारित विषय जसे शारीरिक शिक्षण, कला, व्होकेशनल व इतर विषयांच्या परीक्षा या प्रात्यक्षिक स्वरूपात होणार आहेत.

तिसरी आणि सहावीला शालेय अंतर्गत (इंटरनल) चाचणी ही प्रामुख्याने स्पर्धात्मक तसेच रूब्रिक पद्धतीचा वापर करत होणार आहे. प्रत्येक सत्रातील प्रत्येक विषयासाठी किमान शिक्षकांनी किमान चार उपक्रमांद्वारे विद्यार्थ्यांची चाचणी घेणे गरजेचे आहे. चार चाचण्यांमधील अभ्यासाचे धडे व उपक्रमाची पद्धती ही वेगवेगळी असणे गरजेचे आहे.

मेघना शेटगांवकर, संचालक, जीएससीईआरटी.

तिसरी ते आठवीपर्यंतचे सर्व सत्रांत परीक्षांच्या प्रश्‍नपत्रिका या एससीईआरटीद्वारे काढण्यात येतील. सर्व शाळांना जीएससीईआरटी प्रश्‍नपत्रिका पुरविणार आहेत. या आयोजनासाठी आवश्यक ती काळजी आणि तयारी करण्याचे काम सुरू आहे.