पणजी: शिक्षण संचालनालयाने 2026-27 या शैक्षणिक वर्षाचे अधिकृत वेळापत्रक जाहीर केले. या वेळापत्रकानुसार, राज्यातील शाळांना किमान 220 कामाचे दिवस आणि 200 अध्यापनाचे दिवस पाळणे बंधनकारक करण्यात आले.

शिक्षण विभागाने जारी केलेल्या या नवीन आदेशामुळे आगामी शैक्षणिक वर्षाचे नियोजन स्पष्ट झाले असून विद्यार्थी, पालक आणि शिक्षकांना आतापासूनच आपल्या सुट्ट्यांचे आणि परीक्षांचे नियोजन करता येणार आहे. या शैक्षणिक वर्षात शाळांना एकूण 10 स्वेच्छाधीन सुट्ट्या घेण्याची मुभा देण्यात आली. यामध्ये विशेष म्हणजे गणेश चतुर्थीसाठी 16 सप्टेंबर ते 19 सप्टेंबर 2026 या कालावधीत चार दिवसांची सुट्टी जाहीर करण्यात आली.

नवीन वेळापत्रकानुसार, इयत्ता पहिली ते पाचवी आणि अकरावीचे वर्ग 6 जून 2026 पासून सुरु होतील. परीक्षेच्या वेळापत्रकाबाबतही शिक्षण विभागाने कडक निर्देश दिले आहेत. पहिल्या सत्राच्या परीक्षा 10 ऑक्टोबर 2026 पर्यंत पूर्ण कराव्या लागणार आहेत, तर दुसऱ्या सत्राच्या परीक्षा 13 मार्च 2027 पर्यंत संपवणे आवश्यक आहे. विशेष म्हणजे, कोणत्याही शाळेला 31 मार्च 2027 पूर्वी वार्षिक परीक्षेचा निकाल जाहीर करता येणार नाही, असे आदेशात स्पष्ट करण्यात आले आहे.

शिक्षण संचालनालयाने घेतलेला हा निर्णय शालेय कामकाजात सुसूत्रता आणण्यासाठी महत्त्वाचा मानला जात आहे. 220 दिवसांच्या कामाच्या मर्यादेमुळे अभ्यासक्रम वेळेत पूर्ण होण्यास मदत होईल आणि विद्यार्थ्यांना (Students) पुरेसा वेळ मिळेल. तसेच, सणासुदीच्या सुट्ट्यांचे आधीच नियोजन केल्यामुळे पालकांची गैरसोय टळणार आहे. सर्व सरकारी, अनुदानित आणि विनाअनुदानित शाळांना या नियमांचे काटेकोरपणे पालन करावे लागणार आहे.