Save Mhadei Save Tiger व्याघ्र प्रकल्प हा म्हादई बचावाचा चांगला मार्ग आहे. अशातच मुंबई उच्च न्यायालयाच्या गोवा खंडपीठाने आणि जनतेने पाठिंबा देऊनही सावंत सरकार कर्नाटकचे हित सांभाळत असेल तर हे सरकार गोव्याचे की कर्नाटकचे, असा प्रश्न उपस्थित होतो.

हा व्याघ्र प्रकल्प राबवता येत नसेल तर सरकारने तातडीने राजीनामा द्यावा आणि कर्नाटकात जावे, असा सज्जड दम आरटीआय कार्यकर्ते आणि म्हादई बचाव आंदोलनाचे नेते राजन घाटे यांनी सरकारला दिला आहे.

पत्रकार परिषदेत घाटे बोलत होते. यावेळी प्रतिमा कुतिन्हो, मारियानो फेर्रांव, अनिल लाड, फेलिजिया रापोझ, पेर्पेट फेर्रांव उपस्थित होते.

घाटे म्हणाले की, आपले राज्य किनारपट्टीवर आहे. हवामान बदल तज्ज्ञांच्या मते समुद्र पातळी वाढीमुळे गंभीर पर्यावरणीय धोके निर्माण होऊ शकतात. किनारी भागात खारफुटीची जंगले आणि हिरव्यागार पश्चिम घाटाच्या काही भागांत उरलेले सदाहरित जंगल चक्रीवादळ, भूकंप, पूर आणि इतर आपत्तींपासून नैसर्गिक संरक्षण देईल.

प्रस्तावित व्याघ्र प्रकल्पाखालील वनक्षेत्र गोव्याला वाचवण्यास मदत करेल. सध्या हिमालयीन प्रदेशातील आपत्ती आणि निसर्गाचा प्रकोप आपण पाहात आहोत. राज्यात वाघ होते आणि आहेत. २०१३ मध्ये, कॅमेरा ट्रॅप तंत्राद्वारे घेतलेल्या पहिल्या छायाचित्रानंतर आता नव्याने घेतलेल्या ट्रॅपमध्येही वाघ दिसत आहेत.