Goa's Nursing student committed Suicide in Karnataka

सध्या किशोरवयीन मुलांमध्ये मानसिक ताणतणावामुळे आत्महत्या करण्याचे प्रमाण वाढत चालले असून सत्तरी येथून अशीच धक्कादायक माहिती समोर आली आहे.

‘कर्नाटक येथील आरोग्य धाम’ आवारातील नर्सिंग महाविद्यालयात नर्सिंग डिप्लोमाच्या अंतिम वर्षात शिकत असलेली सत्तरी गोवा येथील ऋतुजा रमेश पाडलोस्कर (वय 21 वर्षे) हिने नर्सिंग महाविद्यालयाच्या इमारतीवरून उडी टाकून आत्महत्या केल्याचे वृत्त हाती आले आहे.

याविषयी मिळालेल्या माहिती नुसार ऋतुजा हिने 30 ऑक्टोबरला अंतिम वर्षाची प्रात्यक्षिक परीक्षा दिली होती. त्यानंतर सायंकाळी तिने इमारतीच्या वरच्या मजल्यावरून उडी मारली. तिला जखमी अवस्थेत के.एच.आय. रुग्णालयात दाखल करण्यात आले.

मात्र उपचारादरम्यान तिचा मृत्यू झाला. घटप्रभाचे पोलीस निरीक्षक बसवराज कामानबैलू या घटनेचा अधिक तपास करत आहेत. ऋतुजाच्या आत्महत्या करण्यामागचे कारण अद्याप समजू शकलेले नाही. या घटनेमुळे सत्तरी परिसरात शोककळा पसरली आहे

दरम्यान दोन दिवसांपूर्वी गोव्यात कामानिमित्त दाखल झालेल्या ओडिसा येथील नवदाम्पत्यापैकी पत्नीने आत्महत्या केल्याची घटना घडली होती. गोव्यात अशा घटनांमध्ये सातत्याने वाढ होत असून पोलीस यंत्रणा गुन्हेगारी थोपवण्याचा प्रयत्न करीत आहे.