Goa Electricity Issue: लवकरच सत्तरीतील वीज समस्या सुटणार असल्याची माहिती डॉ. दिव्या राणे यांनी दिली. नगरगाव येथे आयोजित करण्यात आलेल्या नगरगाव फिडरच्या 11 के.व्ही. नवीन भूमीगत वीज वाहिनी घालण्याच्या कामाच्या पायाभरणी कार्यक्रमात राणे बोलत होत्या.

यावेळी जिल्हा पंचायत सदस्य राजश्री काळे, सरपंच संध्या खाडीलकर, खोतोडाचे सरपंच रोहीदास गावकर आदींची उपस्थिती होती.

डॉ. दिव्या राणे पुढे म्हणाल्या की, येथील बहुतेक वीज वाहिन्या या 40 वर्षांपूर्वी घालण्यात आल्या होत्या. या वाहिन्या जीर्ण झाल्याने वारंवार तुटणे, कार्बन होणे आदी प्रकार सातत्याने होत असत. तसेच पावसाळ्यात झाडे पडणे आदी कारणानेही वीज पुरवठ्यात व्यत्यय येत असे.

त्यामुळे भूमीगत वीज वाहिन्या घालण्यास प्राधान्य दिले आहे. नगरगाव 11 केव्ही फिडर भूमीगत वीज वाहिनीने जोडण्याचे कामाचा आज शुभारंभ झाला आहे.

याचा फायदा नगरगाव पंचायतीबरोबर सावर्डे, खोतोडा पंचायतींनाही होणार आहे. या कामासाठी एकूण 24 कोटी रुपये खर्च येणार आहे.

दोन टप्प्यात हे काम केले जाईल. या कामासाठी मुख्यमंत्री डॉ. प्रमोद सावंत व वीज मंत्री सुदिन ढवळीकर यांचे मोलाचे सहकार्य लाभले आहे, असे त्या म्हणाल्या.

राणे यांच्या हस्ते विधीवत पूजा करून तसेच नामफलकाचे अनावरण करून भूमीगत वीज वाहिनीच्या कामाचा शुभारंभ करण्यात आला.

डबल इंजिनमुळे सत्तरीचा विकास:-

राणे पुढे म्हणाल्या, भाजपच्या डबल इंजिन सरकारमुळे आज सत्तरीच्या विकासाला मोठ्या प्रमाणात चालना मिळत आहे. आरोग्यमंत्री विश्वजित राणे व आपण सत्तरीच्या सर्वांगीण विकासासाठी प्रयत्नशील आहोत. आपण सर्वांना एकत्र राहून सत्तरीला पुढे घेउन जाऊया असे त्या म्हणाल्या.