फोंडा: ऑल इंडिया इन्स्टिट्यूट ऑफ लोकल सेल्फ गव्हर्नमेंटच्या गोवा केंद्रामार्फत नागेशी-बांदोडा येथील संजीवन संस्थेत सॅनिटरी निरीक्षक प्रशिक्षण अभ्यासक्रमासाठी प्रवेश प्रक्रिया सुरू झाली आहे. जून महिन्यापासून सुरू होणाऱ्या या पंधराव्या तुकडीत प्रथम येणाऱ्यास प्राधान्य या तत्त्वावर ४० उमेदवारांना प्रवेश दिला जाणार आहे.

बारावी उत्तीर्ण तसेच दहावीनंतर दोन वर्षांचा डिप्लोमा केलेले विद्यार्थी या अभ्यासक्रमासाठी पात्र आहेत. एक वर्ष कालावधीच्या या कोर्सचे वर्ग शनिवार व रविवार असे आठवड्यातून दोन दिवस घेतले जातील.

प्रशिक्षण पूर्ण केल्यानंतर नगरपालिका, इस्पितळे, केंद्र व राज्य सरकारी आस्थापना तसेच खासगी क्षेत्रात सॅनिटरी निरीक्षक म्हणून रोजगाराच्या संधी उपलब्ध होणार असल्याची माहिती गोवा प्रदेश संचालक डॉ. विश्वनाथ सावंत तळावलीकर यांनी दिली. इच्छुकांनी नागेशी-बांदोडा येथील केंद्राशी संपर्क साधण्याचे आवाहन करण्यात आले आहे.