Goa Accident: दाबामळ कोठार्ली येथे ट्रकखाली आल्याने युवकाचा जागीच मृत्यू झाला. वेळीपवाडा कोठार्ली येथील लवलेश मनोहरच्यारी (25) असे त्याचे नाव आहे. ही घटना काल दुपारी पावणे दोनच्या सुमारास घडली. लवलेश हा दुपारच्या सुमारास दुचाकीने (क्र. जीए-09 सी 1628) घरी जात होता.

दाबामळ कोठार्ली येथील मुख्य रस्त्यावर असलेल्या वळणावर अवजड ट्रक (क्र.एमएच-42 बी 9277) पेप्सी कंपनीच्या दिशेने जात होता. यावेळी वळणावर अचानक समोरून येणाऱ्या ट्रकला पाहून लवलेश गडबडला. त्याचे दुचाकीवरून नियंत्रण सुटून गाडीसह ट्रकखाली आला. या अपघातात त्याचा जागीच मृत्यू झाला.

घटनेनंतर वाहनचालक घटनास्थळावरून फरार झाला. सांगे पोलिस त्यांचा शोध घेत आहेत. दोनच दिवसांपूर्वी लवलेशने आपला 25 वा वाढदिवस साजरा केला होता. दरम्यान, वळणावर असलेली झाडीझुडपे वेळीच कापली असती तर हा अपघात घडला नसता, असे स्थानिकांचे म्हणणे आहे.

युवकांनी अनेकदा शेळपे औद्योगिक वसाहतीत जाणाऱ्या वाहनांना गतीला आवर घालण्यासाठी आणि रस्त्याची साफसफाई करण्यासाठी सूचना केली होती. पण कंपनी सामाजिक कार्याला असहकार्य होत असल्याचा आरोप ग्रामस्थांनी केला. या विषयावरून गुरुवारी रास्ता रोकोचा इशारा त्यांनी दिला आहे.