मडगाव: गोव्यातील सांगे येथे एक धक्कादायक फसवणुकीचा प्रकार उघडकीस आला असून, २०० कोटी रुपयांचे कर्ज मिळवून देण्याचे आमिष दाखवून एका उद्योजकाची तब्बल १.८५ कोटी रुपयांनी फसवणूक करण्यात आल्याची माहिती पुढे आली आहे.

या प्रकरणी सांगे पोलिसांनी कर्नाटकातील मंगळूर येथील पाच संशयितांविरुद्ध फसवणुकीचा गुन्हा दाखल केला आहे. या फसवणुकीची तक्रार अल्बिस ॲग्रो प्रायव्हेट लिमिटेड या कंपनीचे मालक पियुष जारी यांनी दाखल केली आहे.

त्यांनी दिलेल्या माहितीनुसार, संशयितांनी मोठ्या कर्जाची सोय करून देण्याचे सांगून स्टॅम्प ड्युटी व इतर प्रक्रिया खर्चाच्या नावाखाली त्यांच्याकडून हप्त्याने पैसे घेतले. अखेर एकूण १ कोटी ८५ लाख रुपये घेतल्यानंतर या संशयितांनी उद्योजकाशी संपर्क तोडला.

या प्रकरणी योगेश सावंत, जयस्वाल, रोशन साल्ढाणा, आर. के. नायक आणि रेड्डी या पाच जणांविरोधात फसवणुकीसह संबंधित कलमान्वये गुन्हा नोंदविण्यात आला आहे. सध्या पोलिसांकडून याप्रकरणी अधिक तपास केला जात असून, आरोपींचा शोध घेण्यात येत आहे.

हा प्रकार म्हणजे उद्योगपतींना कर्जाच्या आमिषाने जाळ्यात ओढणाऱ्या टोळ्यांचे वाढते प्रमाण अधोरेखित करणारा असून, व्यावसायिकांनी अशा व्यवहारांमध्ये अधिक सतर्क राहणे गरजेचे असल्याचे पोलिसांनी सांगितले.