Goa Road Accident Death Rate Analysis : बुधवारी सकाळी सकाळी आपल्या स्कूटरवरून कॉलेजमध्ये शिकवायला जात असताना माशे काणकोण येथे विरुद्ध दिशेने येणाऱ्या एका कारने धडक दिल्याने सुचिता बांदेकर या २३ वर्षीय तरुणीचा जीव हकनाक गेल्याने गोव्यातील रस्त्यावरील अपघाती मृत्यू हा पुन्हा एकदा चर्चेचा विषय बनला. यंदाच्या वर्षात फक्त ९८ दिवसांत झालेल्या रस्ता अपघातातील आजचा हा मृत्यू ६६ वा बळी ठरला आहे. यातील ८० टक्के दुर्घटना दुचाकीशी निगडीत आहेत.

गोव्यात होणाऱ्या अपघातांचे प्रमाण कमी व्हावे या उद्देशाने वाहतूक विभागाकडून वेगवेगळ्या उपाययोजना हाती घेतल्या असल्या तरी या योजना अपघाती मृत्यूंवर नियंत्रण ठेवण्यास कमी पडत असल्याचे त्यामुळे स्पष्ट झाले आहे. १ जानेवारी ते ८ एप्रिल या कालावधीत गोव्यात एकूण ६४ जीवघेण्या अपघातांची नोंद झाली असून त्यात ६६ जणांचे बळी गेले आहेत. ही आकडेवारी पाहता गोव्यात दर ३५ व्या तासात एकाचा बळी जात असल्याचे स्पष्ट झाले आहे.

अपघातास कार चालकाचा निष्काळजीपणा कारणीभूत असल्याचे प्रत्यक्षदर्शींनी सांगितले. सदर काल चालक चुकीच्या बाजूने आपली कार घेऊन आल्याने हा अपघात झाला. वाहन चालकांचा निष्काळजीपणा, अतिवेगाने वाहने हाकणे, खराब रस्ते आणि रुंद झालेले रस्ते ओलांडताना येणाऱ्या अडचणी यामुळे हे जीवघेणे अपघात होत असून त्यांच्यावर नियंत्रण आणणे हे एक मोठे आव्हान बनले आहे.

गोवा पोलिसांच्या वाहतूक विभागाकडून जी आकडेवारी उपलब्ध आहे त्यानुसार यंदा १ जानेवारी ते आजपर्यंत रस्ता अपघातात बळी गेले आहेत त्यातील ८० टक्के बळी दुचाकी अपघातांशी निगडीत असून या कालावधीत ४२ दुचाकी चालविणाऱ्यांना तर ६ दुचाकीवर मागे बसलेल्यांना असे एकूण ४८ जणांना मृत्यू आला आहे. इतर मृतांमध्ये ७ अन्य वाहनाचे चालक, पाच पादचारी, तीन प्रवासी, दोन सायकलस्वार तर एकाचा अन्य प्रकारे मृत्यू झाला आहे.

आठ दिवसांत चार बळी

एप्रिलच्या या पहिल्या आठ दिवसांत रस्ते अपघातात चार बळी गेले असून त्यातील तीन दुचाकी चालविणाऱ्यांचे असून एक मागे बसलेल्याचा आहे. या चारपैकी दोन महिला आहेत. यंदा जानेवारीत १८, फेब्रुवारीत २३ तर मार्चमध्ये २१ जणांचे रस्ते अपघात बळी गेले आहेत.