Goa Fire Case: दाबोळी विमानतळाजवळ एका चालत्या मालवाहू रिक्षेला आज शॉर्टसर्किटमुळे आग लागल्याची घटना घडली.

माहिती मिळताच वास्को अग्निशमन दलाने घटनास्थळी धाव घेऊन आग आटोक्यात आणली, पण तोपर्यंत रिक्षा जळून खाक झाली. सुदैवाने या दुर्घटनेत कोणतीही जीवितहानी झाली नाही.

मिळालेल्या माहितीनुसार, ही घटना बुधवारी संध्याकाळी 5 वाजता घडली. सदर मालवाहू रिक्षा दाबोळीहून मांगूरहिलच्या दिशेने जात असता विमानतळाजवळ रिक्षाला अचानक आग लागली.

चालकाला याची चाहूल लागताच त्याने प्रसंगवधान राखून आपला जीव वाचवला. रिक्षाला लागलेली आग वाढतच गेली. यावेळी विमानतळावरील कर्मचाऱ्यांनी वरून पाण्याचा फवारा मारून आग आटोक्यात आणण्‍याचे प्रयत्‍न केले.

दरम्‍यान, अग्निशमन दलालाही पाचारण करण्यात आले. अखेर दलाच्या जवानांनी आगीवर नियंत्रण मिळविले, मात्र तोपर्यंत रिक्षा पूर्णपणे जळाली होती. शॉर्टसर्किटमुळे आग लागल्‍याचे सांगण्यात आले.