पणजी: करंझाळे येथे रामा काणकोणकर यांच्यावर झालेल्या जीवघेण्या हल्ल्याच्या गाजलेल्या प्रकरणात उत्तर गोवा जिल्हा व सत्र न्यायालयाने संशयित आरोपी सुरेश नाईक आणि साईराज गावकर यांचा जामीन अर्ज फेटाळला आहे. या निर्णयामुळे या आरोपींना कोणताही दिलासा मिळालेला नसून त्यांची न्यायालयीन कोठडी कायम ठेवण्यात आली आहे. या प्रकरणाची पुढील सुनावणी १७ जूनला होणार आहे.

जिल्हा व सत्र न्यायाधीशांच्या न्यायालयात शुक्रवारी झालेल्या सुनावणीदरम्यान सर्व आरोपी कोलवाळ मध्यवर्ती कारागृहातून व्हिडिओ कॉन्फरन्सिंगद्वारे हजर होते तर आरोपी जेनीटो कार्दोजो प्रत्यक्ष न्यायालयात उपस्थित होता.

न्यायालयासमोर दाखल करण्यात आलेले दोन्ही जामीन अर्ज न्यायालयाने कोणत्याही खर्चाशिवाय फेटाळून लावले. गुन्ह्याचे स्वरूप, तपासातील उपलब्ध पुरावे आणि आरोपांची गंभीरता लक्षात घेता सध्या जामीन मंजूर करण्यास कोणतेही कारण नसल्याचे न्यायालयाने नमूद केले.

मुख्य आरोपी जेनीटो कार्दोजो याला यापूर्वी जामीन मिळाला आहे. राज्य सरकारने आणि पीडित रामा काणकोणकर यांनी या जामीन आदेशाला उच्च न्यायालयात आव्हान दिले आहे. हायकोर्टात या प्रकरणाची सुनावणी प्रलंबित असून राज्य सरकारने जेनीटो कार्दोजोला मिळालेला जामीन रद्द करण्याची मागणी केली आहे.

१७ जून रोजी सुनावणी

जामीन अर्ज फेटाळल्यानंतर न्यायालयाने प्रकरण १७ जून २०२६ रोजी आरोप निश्चितीपूर्वी युक्तिवादसाठी ठेवले आहे. या सुनावणीत सरकारी पक्ष न्यायालयाला आरोपींविरुद्ध आरोप निश्चित करण्यासाठी पुरेसे प्रथमदर्शनी पुरावे असल्याचे पटवून देण्याचा प्रयत्न करणार आहे, तर बचाव पक्ष आरोप निश्चित न करण्याची विनंती करणार आहे.