पणजी: येथील आकाशवाणी केंद्रातील श्रोता अनुसंधान अधिकारी दिनकर यादव यांचे सुपुत्र राजवर्धन यादव यांनी फायटर पायलट प्रशिक्षण यशस्वीरित्या पूर्ण करून ‘विंग्ज’ आणि ‘ब्रेव्हेट्स’ प्राप्त केले. संरक्षणमंत्री राजनाथ सिंह यांनी २१७ व्या तुकडीच्या संयुक्त दीक्षांत संचलनाचे निरीक्षण केले आणि उत्तीर्ण झालेल्या उमेदवारांना ‘प्रेसिडेंट्स कमिशन’ प्रदान केले.

नॅशनल डिफेन्स अकादमीमधील महिलांच्या पहिल्या तुकडीसह हैदराबादमधील डुंडीगल येथील हवाई दल अकादमीमधून पदवी अभ्यासक्रम पूर्ण केलेल्या एकूण २३१ फ्लाईट कॅडेट्सना (१९४ पुरुष व ३७ महिला) १३ जून रोजी भारतीय हवाई दलात अधिकारी म्हणून नियुक्त केले. यात राजवर्धन यादव यांचा समावेश आहे.

राजवर्धन यांनी शालेय शिक्षण पीएम श्री केंद्रीय विद्यालय, आयएनएस मांडवी नौदल तळ, वेरे येथून पूर्ण केले आणि गोवा कॉलेज ऑफ इंजिनिअरिंग, फर्मागुडी येथून बी.ई. ही पदवी संपादन केली. त्यानंतर त्यांनी अखिल भारतीय स्तरावरील ‘एएफसीएटी’ स्पर्धा परीक्षा उत्तीर्ण केली व एअर फोर्स अकादमी, डुंडीगल, हैदराबाद येथे प्रशिक्षण यशस्वीरित्या पूर्ण केले.