पणजी: राज्यात गेल्या २४ तासांत सरासरी २३.९ मिमी पावसाची नोंद झाली असून, यंदाच्या हंगामातील एकूण पावसाने ३० इंचांचा टप्पा पार केला आहे. मात्र, अद्याप राज्यात २७ टक्के पावसाची तूट कायम आहे.

पुढील चार दिवस मध्यम स्वरूपाच्या पावसाचा अंदाज व्यक्त करत गोवा वेधशाळेने ‘यलो अलर्ट’ जारी केला आहे. गेल्या २४ तासांत सर्वाधिक ६६.४ मिमी (२.६१ इंच) पावसाची नोंद झाली. त्याखालोखाल सांखळी येथे ४४.६ मिमी, सांगे येथे ३८.३ मिमी, म्हापसा येथे ३३.३ मिमी, फोंडा येथे ३० मिमी, दाबोळी १४.८ मिमी, पेडणे १२.६ मिमी, मुरगाव १०.६ मिमी, जुने गोवा ५.८ मिमी, काणकोण आणि पणजी येथे प्रत्येकी ४.२ मिमी पाऊस झाला.

दरम्यान, पावसामुळे राज्यातील विविध भागांत झाडे कोसळण्याच्या घटना सुरूच आहेत. बायणा (वास्को) येथे अवर लेडी ऑफ कँडेलारिया शाळेजवळ रस्त्यावर माड कोसळला. खांडोळा येथील सरकारी महाविद्यालय परिसरात वाहनावर झाड पडल्याने नुकसान झाले. ब्रह्मकरमळी येथे मंदिराशेजारी काजूचे झाड रस्त्यावर कोसळले.