पणजी: राज्यात पावसाचा जोर मंदावला असून, तुरळक पाऊस पडत आहे. पावसाने संथगतीने सत्तर इंचांचा टप्पा पूर्ण करण्याकडे वाटचाल सुरू केली आहे.

राज्यात आतापर्यंत १७३१ मिमी म्हणजेच ६८.१७ इंच पावसाची नोंद करण्यात आली आहे. पुढील काही दिवसांत पाऊस ७० इंचांचा टप्पा पूर्ण करेल, तर वाळपईत पाऊस शतकी सलामी देणार आहे. वाळपईत सर्वाधिक ९६ इंच पावसाची नोंद करण्यात आली आहे.

मागील २४ तासांत राज्यात सरासरी १८ मिमी पावसाची नोंद झाली असून, राज्यात ३०.९ टक्के पावसाचा तुटवडा नोंदविला आहे. मागील २४ तासांत मडगावात ४५ मिमी, मुरगावात २४ मिमी, केपेत २४ मिमी, वाळपईत २२.६ मिमी व इतर भागांत तुरळक पावसाची नोंद करण्यात आली आहे.

पणजीकडे पावसाची पाठ

राज्यात पाऊस ७० इंचांचा टप्पा पार करणार असला आणि अनेक भागांत ९० इंचांहून अधिक पाऊस पडला असला, तरी राजधानी पणजीत अजून ५० इंचांहूनही कमी पाऊस पडला आहे. राज्यात सर्वांत कमी, ४३ इंच इतका पाऊस पणजीत पडला आहे. पणजीसोबतच दाबोळीत ४६ इंच, तर मुरगावात ४५ इंच पावसाची नोंद करण्यात आली आहे.