पणजी: पाऊस परतीचा असला तरी त्याचा जोर मात्र अजूनही कायम आहे. राज्यात अजूनही काही ठिकाणी पावसाच्या सरी कोसळत असल्यामुळे हवामान खात्याने (IMD) गोव्यासाठी पुढील दोन दिवसांसाठी 'यलो अलर्ट' जारी केला आहे. हवामान खात्याच्या अंदाजानुसार, १५ आणि १६ ऑक्टोबर रोजी राज्यात पावसाचे प्रमाण वाढण्याची शक्यता आहे.

पुढील दोन दिवस राहा सतर्क!

मिळालेल्या माहितीनुसार, १४ ऑक्टोबर रोजी दक्षिण गोव्यात तुरळक पावसाची शक्यता आहे, परंतु त्यानंतर पुढील दोन दिवस उत्तर गोवा आणि दक्षिण गोवा या दोन्ही जिल्ह्यांमध्ये पावसाच्या सरी बरसू शकतात.

आगामी १ ते ४ तासांत उत्तर आणि दक्षिण गोवा जिल्ह्यांमध्ये विजांच्या कडकडाटासह हलक्या ते मध्यम स्वरूपाचा पाऊस पडण्याची शक्यता आहे. यामुळे स्थानिकांना सतर्कतेचा इशारा देण्यात आला आहे.

सत्तरीत मोठे नुकसान

काही दिवसांपूर्वीच परतीच्या जोरदार पावसाने सत्तरीतील काही भागांमध्ये मोठे नुकसान केले होते. वाळपई हॉस्पिटलसमोर स्थानिकांनी ढगफुटीसदृश पावसाचा अनुभव घेतला, तर अनेक ठिकाणी झाडांची पडझड झाली होती. यामुळे अनेकांचे नुकसान झाले असून, स्थानिक नागरिक आता पाऊस कायमचा रामराम ठोकण्याची वाट पाहत आहेत.