Goa News: बांबोळी येथील मनोरुग्ण इस्पितळात गेली 12 वर्षे काम करणाऱ्या एका कर्मचाऱ्याने बनावट प्रमाणपत्रे सादर करून साहाय्यक म्हणून नोकरी मिळवली असून त्याला सेवेतून निलंबित करेपर्यंत आपण आझाद मैदानावर लाक्षणिक आंदोलन करीत राहणार असल्याचे सरकारी कर्मचारी संघटनेचे माजी अध्यक्ष जॉन नाझारेथ यांनी आझाद मैदानावर झालेल्या पत्रकार परिषदेत बोलताना घोषणा केली. (Goa News)

सतिश नामक कर्मचारी या मनोरुग्ण इस्पितळात सुतार काम करीत होता. जेव्हा ऑक्युपेशनल थेरेपी या विभागात तांत्रिक पद निर्माण झाले, तेव्हा सदर व्यक्तीस ते पद देण्यात आले. त्यासाठी जोडण्यात आलेली कागदपत्रे आणि प्रमाणपत्रे बनावट असल्याचा दावा नाझारेथ यांनी केला आहे.

एकाच वेळी चार ठिकाणी काम केल्याचा अनुभव प्रमाणपत्र त्याने जोडले होते. ज्या काळात त्याने महाराष्ट्रातून प्रशिक्षण घेतले होते. त्याच काळात पर्वरी येथेही तो प्रशिक्षण घेत होता, असे त्याने सादर केलेल्या कागदपत्रावरून समजते, अशी माहिती त्यांनी दिली.

वशिल्याने सदर भरती झाल्याचा आरोप करताना आपणाकडे सर्व पुरावे असल्याचे ते म्हणाले. पोलिस स्थानकात तक्रार देऊन झाली, तरी कारवाई होत नाही. खात्यांतर्गत कारवाईही केली जात नाही. जोपर्यंत सदर कर्मचाऱ्याला निलंबित केले जात नाही, तोपर्यंत आपले आंदोलन चालूच राहणार असल्याचे ते म्हणाले.

न्याय मिळावा..

यापूर्वी एका युुवकाने आवाज उठवला होता. सदर कर्मचारी बडतर्फ व्हावा, म्हणून त्याने अनेक प्रयत्न केले होते. त्या युवकाचे निधन झाल्याचे आपल्याला समजले. त्याला न्याय मिळावा म्हणून आपण हे आंदोलन करीत असल्याचे नाझारेथ म्हणाले.